Blerja afatgjatë e energjisë nga Korporata Elektorenergjetike Shqiptare pritet të finalizohet në fund të këtij muaji. Referuar afateve të publikuar nga KESH për kontratat me kohëzgjatje 3 dhe 5-vjeçare, ofertimi nga kompanitë që do të kalojnë fazën e parakualifikimit do të bëhet në periudhën 15 – 18 maj, ndërkohë që negocimi i kontratës dhe lëshimi i garancive do të mbyllet brenda datës 30 maj.
Do të jetë kjo fazë që do të përcaktojë çmimin me të cilin do të blihet energjia, teksa gjatë planifikimit të procedurave, KESH parashikonte çmime shumë herë më të larta se ato që shënohen aktualisht në tregjet ndërkombëtare. Gara e pazakontë për KESH, që derimëtani ka operuar me blerje ditore ose javore, u hap në mesin e muajit mars, ndërkohë që kompanitë e interesuara kishin 1 muaj kohë për të dorëzuar dokumentet e kërkuara.
KESH e argumentoi këtë procedurë të pazakontë me detyrimin për të përmbushur të gjithë konsumin e brendshëm për tensionin e ulët dhe të mesëm, ndërkohë që në dokumenetet e zbardhur më herët nga TV justifikohej me nevojën për menaxhimin e kostove.
Gjithsesi, blerja afatgjatë energjisë në këtë periudhë kur çmimet e energjisë në tregje janë tejet të luhatshme, ndërsa po synohet shtimi i kapaciteteve prodhuese në vend, është kritikuar nga ekspertët e sektorit. Po ashtu, sipas tyre kjo blerje ve në pikëpyetje edhe funksionin e bursës shqiptare të energjisë elektrike, përsa kohë një pjesë e transaksioneve të blerjes do të jenë të kryera deri në vitin 2028.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
