Blerja e energjisë së prodhuar nga centrali fotovoltaik në Karavasta do të jetë pjesë e ndihmës shtetërore. Komisioni, që kryesohet nga ministrja e Financave dhe Ekonomisë, Delina Ibrahimaj ka vendosur të autorizojë një skemë ndihme të propozuar nga Ministria e Infrastrukturës dhe Energjisë, në fillim të këtij viti. Ndërkohë që, referuar të dhënave në skemën e njoftuar, kompania Voltalia që ka fituar ankandin për centralin 140 MW, do të sigurojë mbështetje nga burime shtetërore, për energjinë elektrike të gjeneruar, në rastin e një konvertimi të Marrëveshjes për Blerjen e Energjisë Elektrike PPA me likuidim fizik, në një kontratë për diferencë me likuidim financiar.
Kontrata PPA parashikon blerjen e energjisë eletkrike me një çmim fiks prej 24.89 euro/mWh për 15 vjet për kapacitetin 70 MW. Ndërkohë që, konvertimi i kontratës do të duhet të bëhet me plotësimin e disa kushteve, ku përfshihen konsolidimi i transaksioneve përmes Burës Shqiptare të Energjisë Elektrike, ALPEX. Në momentin që ndodh konvertimi i kontartës dispozitat për livrimin dhe pagesën do të ndryshohen për të parashikuar çmimin e tregut për energjinë e prodhuar dhe ndarjen e elementit të shpërblimit të ndryshueshëm nga çmimi i tregut.
Ndërkaq, në vendimin e Komisionit të Ndihmës Shtetërore, ndër të tjera thuhet se duke qenë se energjia elektrike tregtohet në tregje ndërkombëtare, referuar të dhënave të skemës së njoftuar, ekziston mundësia që skema të ndikojë në situatën e konkurrencës në treg të energjisë elektrike treg dhe ndikojë në tregtinë ndërmjet shtetesh. Por, referuar përjashtimeve të ligjit, komisoni ka vendosur miratimin e skemës, duke vlerësuar se skema e njoftuar synon të nxisë prodhimin e energjisë elektrike nga burime të rinovueshme.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
