Ndërsa prej dy vitesh po përjeton një situatë të favorshme buxhetore për shkak të shtimit të të ardhurave nga rritja e çmimeve, por edhe mbiçmimit të lekut në raport me valutat, Qeveria pret që kjo ecuri të vazhdojë edhe 3 vitet në vijim.
Këshilli i Ministrave ka publikuar dokumentin me parashikimet afatmesme buxhetore 2023-2026, ku pret që të ardhurat në fund të këtij viti të arrijnë në 642.6 miliardë lekë, ose me rritje 10% krahasuar me vitin 2022, i cili u mbyll me një total prej 579.8 miliardë lekë. Në rritje pritet edhe në tre vitet në vijim, për ta arritur kulmin në vitin 2027 me një total prej 716.8 miliardësh, ose 23% më shumë nga viti 2022.
Të ardhurat tatimore pritet që këtë vit të arrijnë në total 558.4 miliardë lekë në rritje me 2.3% krahasuar me vitin e shkuar. Në vitin 2026, pritet që totali i të ardhurave tatimore të arrijë në 679.1 miliardë lekë, ose 24% më shumë se viti 2022. Të ardhurat nga akcizat pritët që këtë vit të jenë 59 miliardë lekë, me rritje prej rreth 7% krahasuar me vitin 2022, të cilin e mbyllën me një total prej 55 miliardë lekësh. Të ardhurat nga akcizat në vitin 2026 parashikohen që të shkojnë në 69.2 miliardë lekë, 25.4% më shumë se viti 2022.
Ndërkohë që tatimi mbi të ardhurat personale është një tjetër zë që pritet të sigurojë shumë fonde në arkën e qeverisë për peirudhën afatmesme. Ai pritet që për vitin 2023 të sigurojë në total 49 miliardë lekë në arkën e shtetit, 4.2% më shumë se në vitin 2022. Të ardhurat nga ky zë pritet të rriten në mënyrë të pandërprerë vit pas viti, për të arritur në vitin 2026 në 57.3 miliardë lekë, ose 12.7% më shumë nga sa ishin në vuitin 2022.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
