Të gjithë emigrantët shqiptarë në Greqi dhe Itali kanë një mundësi reale për të përfituar pensionin kur e mbushin moshën. Një skemë efikase për këtë e shpjegoi në televizionin , zv ministrja e financave, Olta Manjani e ftuar në emisionin EKOPULS me gazetarin Fatos Çoçoli. Duke marrë si shembull Gjermaninë, ajo tha se mjafton që personi të emigrojë qofte edhe 6 muaj në një vend të BE, me të cilin vendi ynë ka marrëveshje për pensionet dhe që aty mund të mbledhë të gjithë kontributet.
“Nëse një shqiptar do të emigrojë qoftë edhe një periudhë minimale 6 mujore apo një vit në Gjermani, mund t’i njihen të gjitha vitet e pensionit nga puna në një vend tjetër të BE, pasi Gjermania ka një marrëveshje pensionesh me Shqipërinë. Kështu mund t’i përfitojnë të gjithë vitet e punës edhe ata shqiptarë që kanë punuar në Itali dhe Greqi”, sqaroi Manjani.
Duket se shanset për të patur një marrëveshje pensioni me Italinë dhe Greqinë, megjithë përparimet që janë bërë janë të ulta. Arsyet i shpjegojnë, ish zëvendës ministri i Punës dhe Çështjeve Sociale Kastriot Sulka dhe eksperti i ekonomisë Majlind Lazimi.
“Me grekët kemi shumë probleme që nuk varen vetëm nga qeveria greke. Kemi problem të shumta të legalitetit të vetë përsonave që kanë punuar e punojnë atje. Është e pamundur që ata që kanë ndërruar emrat të përfitojnë. Bujari nuk mund të njihet tashmë që ka marrë emrin Jorgo. Kështu që kjo nuk zgjidhet direct. Me Italinë problemin e ka qeveria italiane. Për ata nuk është ndonjë problem të japë pensionet për shqiptarët, por nëse i japin i hapin problem vetes me emigrantët e vendeve të tjera që janë atje”, tha Sulka.
‘Nëse vërtetë ka dy vende që duhet të kemi marrëveshje për pensionet, sfidat janë Italia e Greqia. Por zgjidhja kërkon vullnet politik, ndaj emigrantëve tanë atje u duhet të zgjedhin këto rrugët e tërthorta për të përfituar”, u shpreh Lazimi.
Shqipëria ka marrëveshje për pensionet me disa vende të Bashkimit Europian, ku sigurisht vendi më kryesor është Gjermania. Ndërkohë vetëm pak ditë më parë është finalizuar marrëveshja edhe me Kroacinë, një tjetër vend anëtar i BE.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
