Procesi i fiskalizimit, që nisi zbatimin dy vite më parë dhe revolucionarizoi mënyrën se si bizneset komunikojnë me sistemin tatimor në vend, ka nxitur biznesin e ofrimit të zgjidhjeve teknologjike.
Kompanitë e certifikuara nga Drejtoria e Tatimeve për pajisje dhe aplikacion shitjesh për standardet e reja të fiskalizimit, kanë raportuar rritje të lartë të ardhurash dhe fitimesh.
“Advanced Business Solutions – ABS”, e licencuar nga tatimet për shërbimet e fiskalizimit, por që ofron dhe zgjidhje të ndryshme software për bizneset, raportoi fitime rreth 250 milionë lekë, me një normë prej 25%. Të ardhurat ishin rreth 1 miliard lekë, në nivele të ngjashme me 2020-n. Kompania ka një aktivitet të qëndrueshëm dhe është prej vitesh në listën e “Monitor 200”, sipas fitimeve.
“Image & Communications Development” – (Devpos), që ofron shërbimet e fiskalizimit, është një hyrje e re në listën e fitimeve. Të ardhurat e saj pothuajse u trefishuan në 617 milionë lekë. Edhe fitimet thuajse u dyfishuan në 256 milionë lekë, me një normë prej 41%.
“Communication Progress” është një tjetër hyrje në listën e fitimeve nga kompanitë e licencuara për fiskalizimin, pas rritjes me 48%, në 230 milionë lekë. Norma e fitimit ishte e lartë, në gati 45%.
Në 2020-n, bllokimi i papritur i ekonomisë diktoi punën në distancë dhe e orientoi aktivitetin e shumë kompanive tregtare drejt shitjeve online. Në gjithë botën u pa rritje e madhe e përdorimit të teknologjisë për sektorin e tregtisë, shëndetësisë, rrjeteve sociale.
Për t’iu përgjigjur kësaj kërkese, në vend dhe në botë, 2020-a pa një zhvillim të shpejtë të shoqërive që ofrojnë shërbimin e teknologjisë së informacionit, që po rezulton një aktivitet shumë fitimprurës.
Në renditjen e 2020-s të “Monitor 200”, sipas fitimeve, u shënuan shumë hyrje të reja nga ky segment, që deklaronin norma të larta fitimi.
Por, duket se ato nuk kanë arritur të kapin momentin. Rikthimi i normalitetit ka “rikthyer” zakonet e vjetra të sipërmarrjeve shqiptare, duke ulur kërkesën për shërbime të teknologjisë së informacionit.
Të mëdhenjtë e IT, me rritje
Në fushën e sistemeve të teknologjisë së informacionit, operatori më i madh në vend mbetet “Infosoft System”, me të ardhura 2.8 miliardë lekë dhe fitime 847 milionë lekë, për 2021-n.
Kompania tjetër “Infosoft Software Development”, e fokusuar në prodhimin e softuerëve pothuajse trefishoi të ardhurat në 403 milionë lekë. Edhe fitimet u rritën disa herë, duke arritur në 293 milionë lekë.
Call center, tre kompani në listë
Biznesi i qendrave të thirrjeve telefonike (call center) mori një zhvillim të shpejtë pas vitit 2010, duke u bërë një prej punëdhënësve më të mëdhenj të të rinjve.
Por, vitet e fundit, ky treg është në maturim, i ndikuar si nga masat që mori qeveria italiane për të ruajtur vendet e punës në Itali, ashtu dhe nga problematika e gjetjes së fuqisë punëtore në vend dhe faktit që brezi i sotshëm i të rinjve nuk ka më njohuri aq të mira të gjuhës italiane.
Emigracioni i të rinjve është kthyer realisht në një faktor që po pengon zhvillimin e këtij segmenti, që vitet e fundit po kalonte drejt një niveli më të lartë përveç thirrjeve telefonike, duke ofruar zgjidhje të integruara për partnerët e huaj dhe kërkesa nuk ka munguar për shërbime të tilla.
Në listën e “Monitor 200”, sipas fitimeve, janë vetëm tre kompani të këtij segmenti, ndryshe nga vitet e kaluara, kur ato po shtoheshin me shpejtësi. “Albania Marketing Service” mbetet më e madhja, si për të ardhurat, edhe fitimet, me këto të fundit që ishin rreth 2 miliardë lekë, me një normë prej 27%.
“Assist”, po në këtë segment, kishte fitime prej 372 milionë lekë, me normë 17%.
“Fiber Group” është një hyrje e re në listën e “Monitor 200”, sipas fitimeve, pas rritjes së ndjeshme të aktivitetit në 2021. Të ardhurat e operatorit më se u dyfishuan në 726 milionë lekë, ndërsa fitimet arritën në 262 milionë lekë, me një normë prej gati 31%.
“Albacall”, e dyta më e madhe në vend pas “Albania Marketing Service”, e mbylli aktivitetin në vend në shkurt të vitit 2022, si rrjedhojë e mosfitimit të kontratave me partnerët në Itali.
Postimi ” Fiskalizimi fut në listën e të mëdhenjve ofruesit e shërbimeve ” eshte marre nga Revista Monitor.
