Me avancimin e teknologjisë, bota është bërë gjithnjë e më shumë e pasigurt. E thënë ndryshe, informacionet që po prodhohen në internet duhen parë gjithnjë e me më shumë skepticizëm, nëse janë reale apo jo.
Fotoja më lart ka fituar javën e kaluar një prej çmimeve më prestigjioze, “Sony World Photography”, por artisti ka refuzuar që ta pranojë. Arsyeja? Sepse kjo foto nuk është origjinale, por është krijim i inteligjencës artificiale.
![](https://wallstreet.al/ngarkuara/Fitoi-vendin-e-pare-me-foto-te-realizuar-nga-inteligjenca.jpg)
Artisti gjerman Boris Eldagsen tregoi se përdori këtë imazh për të testuar konkurrencën, si dhe për të ndezur një diskutim për të ardhmen e fotografisë. Me anë të një reagimi, Eldagsen falënderoi jurinë që përzgjodhën imazhin e tij, duke e cilësuar si një moment historik, teksa shtroi pyetjen “nëse ndonjë nga anëtarët e ka kuptuar që është produkt i inteligjencës artificiale”. “Imazhet e AI (Artificial intelligence) dhe fotografia nuk duhet të konkurrojnë me njëra-tjetrën në një çmim si ky”, shtoi ai. “Ata janë entitete të ndryshme. AI nuk është fotografi. Prandaj nuk do ta pranoj çmimin”, tha ai.
![](https://wallstreet.al/ngarkuara/1681834122_646_Fitoi-vendin-e-pare-me-foto-te-realizuar-nga-inteligjenca.jpg)
Organizatorët e eventit thanë se e njohin “rëndësinë e kësaj teme dhe ndikimin e saj në krijimin e imazhit sot”, por theksuan se çmimet “gjithmonë kanë qenë dhe do të vazhdojnë të jenë një platformë për të përkrahur përsosmërinë dhe aftësinë e fotografëve dhe artistëve që punojnë në terren”.
Kjo nuk është hera e parë që një produkt i inteligjencës artificiale fiton një çmim në një konkurs fotografie. Hera e fundit ndodhi në SHBA, shtatorin e kaluar, dhe kjo ka rindezur një debat shumë të fortë. Shumë artistë dhe fotografë akuzojnë sistemet e inteligjencën artificiale për shfrytëzim të padrejtë të veprave të qindra mijëra krijuesve njerëzorë, madje kanë nisur veprime ligjore. Mirëpo, të tjerë thjesht e konsiderojnë inteligjencën artificiale si një mjet të ri, një kategori të re arti ndoshta, por jo më pak të vlefshme.
Burimi: A2 CNN