Thatësira që dominoi pjesën më të madhe të vitit 2025 uli ndjeshëm prodhimin vendas të energjisë, duke bërë që importet të rriteshin ndjeshëm për të plotësuar nevojën.
Sipas të dhënave zyrtare, Korporata Elektroenergjetike Shqiptare (KESH) shpenzoi 272 milionë euro për të përmbushur detyrimin e shërbimit publik, një detyrim i përcaktuar me vendim qeverie në vitin 2022, në kulmin e krizës energjetike.
Në bazë të këtij detyrimi, KESH, përveç prodhimit të tij nga kaskada e Drinit, siguron në tregun e lirë edhe energjinë e nevojshme për konsumatorët fundorë që furnizohen nga Shërbimi Universal.
Konkretisht gjatë 2025, KESH bleu rreth 1.81 milionë MWh energji në tregun e lirë me një çmim mesatar prej 127.55 euro/MWh, duke e çuar faturën totale, përfshirë TVSH-në, në 272 milionë euro. Këto blerje pasqyruan një kërkesë relativisht të lartë për energji në raport me prodhimin vendas, i cili mbuloi vetëm 44.4% të konsumit total të vendit. Konsumi kombëtar në fund të vitit arriti mbi 8.34 milionë MWh.
Përveç importeve të realizuara nga KESH dhe prodhimit të tij, një pjesë e furnizimit sigurohet edhe nga Furnizuesi i Tregut të Lirë pjesë e OSHEE Group, përmes kontratave me prodhues me përparësi, ku përfshihen hidrocentralet me kapacitet deri në 15 MW dhe impiantet fotovoltaike deri në 2 MW, në përputhje me kuadrin ligjor në fuqi.
Megjithëse kushtet hidrike u përmirësuan disi në fund të vitit, kur reshjet shkaktuan edhe përmbytje, kjo nuk arriti të ndryshojë ndjeshëm bilancin vjetor të prodhimit. Hidrocentralet patën një prodhim vjetor më të dobët krahasuar me vitin paraardhës, ndërsa i vetmi segment në rritje mbeti ai fotovoltaik, i mbështetur nga shtimi i kapaciteteve të reja në prodhim.
Të dhënat e bilancit energjetik të INSTAT treguan se hidrocentralet publike prodhuan 3,374 GWh në vitin 2025, nga 4,085 GWh një vit më parë, duke shënuar një rënie prej 17.4%. Prodhuesit privatë dhe koncesionarë regjistruan një prodhim prej 3,109 GWh, në rënie me 4.2% krahasuar me 2024. Në të kundërt, prodhimi nga burime të tjera të rinovueshme arriti në 984 GWh, nga 507 GWh në vitin paraardhës, duke reflektuar një rritje prej 94.3%./ N.Maho
Postimi ” Importet e energjisë në vitin 2025 arritën 272 milionë euro, të nxitura nga thatësira ” eshte marre nga Revista Monitor.
