Inflacioni i lartë gjatë gushtit në vendet e Bashkimit Europian dhe një forcim i mundshëm i euros mund të pasohet nga rritje të çmimeve, kryesisht të ushqimeve në Shqipëri. Kjo për shkak të varësisë së lartë që vendi ka në drejtim të importeve nga eurozona. Të dhënat nga Instituti i Statistikave tregojnë se 7 muajt e parë të vitit, mallrat e blerë në 27 vendet e “bllokut” përbënë gati 52 për qind të totalit.
“Duke qenë se nga vendet e BE-së është e mbështetur pjesa më e madhe importeve të Shqipërisë, automatikisht inflacioni në eurozonë përcillet pjesërisht edhe në vendin tonë”, thotë Teuta Nunaj, eksperte për ekonominë.
Por thyerja e ecurisë rënëse 3-mujore e inflacionit në eurozonë mund të jetë një lajm i keq edhe për shqiptarët që kanë marrë një kredi në euro. Banka Qendore Europiane ka paralajmëruar shtrëngim më tej të normave të interesit, vendimmarrje e cila do t’i detyronte kredimarrësist shqiptarë në valutë të nxirrnin ca para më tepër nga xhepat.
“Kjo për shkak se kreditë në euro që merren në Shqipëri kanë në përmbajtje euriborin i cili sa herë rritet norma e interesit nga Banka Qendrore Europiane përcillet te këstet e kredive”, thotë Nunaj.
Në korrik norma e inflacionit në vend ra në nivelin 4.2 për qind. Ndërkohë, inflacioni te ushqimet mbeti në nivelet më të larta historike, në 9 për qind.
Burimi: A2 CNN
