Investimet e huaja direkte po rriten edhe gjatë këtij viti, duke ndjekur trendin e fortë të nisur që pas pandemisë. Banka e Shqipërisë vlerëson se kompanitë e huaja investuan mbi 308 milionë euro në harkun e muajve janar-mars, në rritje krahasuar edhe me 302 milionë eurot e fillimvitit të shkuar.
Pjesa më e madhe i takon fitimeve të riinvestuara të ndërmarrjeve, apo mbi 183 milionë euro. Ky segment, është edhe ai që ka njohur rritjen më të madhe përgjatë viteve të fundit.
Real estate vijon të mbetet sektori kryesor që ka thithur pjesë nga këto investime. Shumë kompani dhe individë të huaj i shohin pasuritë e paluajtshme, veçanërisht në kryeqytet dhe në zonat bregdetare si një mekanizëm për të gjeneruar të ardhura, falë edhe rritjes konstante të turizmit dhe vlerës së pronave në treg.
Ndërsa sektorë të tjerë me peshë në investimet e huaja janë edhe energjia, e rigjallëruar vitet e fundit dhe me një rëndësi shtesë që pas krizës në Europë, ndjekur nga industria nxjerrëse.
Nëse ky ritëm i investimeve do të mbahet edhe gjatë pjesës së mbetur të vitit, do të mund të tejkalohet edhe shifra rekord prej 1.3 miliardë eurosh e vitit të shkuar.
Garë e humbur, Shqipëria, vendi më pak joshës në Rajon për investimet e huaja
Burimi: A2 CNN
