Ndërhyrjet në ndërtesa në Shqipëri, në funksion të eficiencës së energjisë, do të kishin një kosto prej 25.22 miliardë euro deri në vitin 2050, dhe kursimi që do të arrihej nga kjo do të mund të mbulonte këto masa brenda një dekade.
Plani Kombëtar për Rinovimin e Ndërtesave, i nxjerrë për konsultim nga Ministria e Infrastrukturës dhe Energjisë, nënvizon se nga analiza e përgjithshme, sipërfaqja totale e stokut të ndërtesave në Shqipëri është 81.17 milionë m² (për vitin 2023, duke përfshirë vetëm ndërtesat e banimit të banuara) dhe do të rritet deri në 140.54 milionë m² në vitin 2050.
Të paktën 41.27% e gjithë stokut të ndërtesave përbëhet nga ndërtesa rezidenciale njëkatëshe, ndërsa vetë sektori i ndërtesave rezidenciale ka një sipërfaqe prej 56 milionë m², i ndjekur nga kategoria e ndërtesave private me gati 19 milionë m², ndërsa ndërtesat publike kanë një sipërfaqe totale prej pak më shumë se 6.24 milionë m². Tabela 10.1 paraqet një përmbledhje të sipërfaqes totale të llogaritur për çdo sektor për vitin 2023 dhe vitin 2050.
“Analiza e 15 ndërtesave referente për sektorët rezidencial, publik dhe privat tregon se potenciali i përgjithshëm i kursimit të energjisë në sektorin e ndërtesave në Shqipëri është 40-55% për rinovimin e thellë dhe 70-95% për rinovimin ZEB, kundrejt kërkesës për energji sipas skenarit bazë. Vlera monetare e këtyre kursimeve të energjisë (me çmimet aktuale) është paraqitur në tabelën 10.2.”
Vlerësimi i tregut, i kryer për këtë plan, identifikon një nivel të konsiderueshëm të kursimeve potenciale të energjisë që mund të arrihen në Shqipëri duke zbatuar masa për eficiencën e energjisë në stokun e ndërtesave të vendit.
Realizimi i potencialit të plotë të kursimit të energjisë, bazuar në masat me kosto efektive, do të kërkonte një investim total kumulativ prej rreth 25,223 milionë euro deri në vitin 2050 (shih tabelën e mësipërme) dhe kjo do të gjeneronte kursime vjetore të kostos për pronarët dhe përdoruesit përfundimtarë prej rreth 3,589 milionë euro — që do të thotë se kursimet do të mbulonin koston e masave brenda rreth 10.61 vjetësh për dekarbonizimin e stokut të ndërtesave në përgjithësi,” thuhet në dokument.
I njëjti thekson se periudha mesatare më e shkurtër e ponderuar e kthimit është për ndërtesat private dhe komerciale, për shkak se ky sektor paguan çmime relativisht më të larta të energjisë elektrike (në fakt ata paguajnë çmimin e tregut) krahasuar me sektorët e ndërtesave rezidenciale dhe publike. Përfitimi shtesë i këtyre kursimeve të energjisë nuk do të kufizohej vetëm në sektorin e pronarëve/qiramarrësve, por do të përhapej në ekonomi në tërësi.
“Përfitimet shtesë zakonisht klasifikohen në tre grupe: mjedisore, ekonomike dhe sociale. Grupi i parë përmban ndikimet më të rëndësishme dhe të drejtpërdrejta të eficiencës së energjisë, si kursimet e energjisë dhe reduktimet e emetimeve të gazeve me efekt serrë.
Grupi i dytë përfshin, ndër të tjera, ndikimet pozitive makroekonomike në rritjen ekonomike, inovacionin dhe konkurrencën, si dhe varësinë nga importet.
Grupi i tretë mbulon aspekte të tilla si përfitimet shëndetësore, reduktimi i varfërisë dhe punësimi. Megjithëse përfitimet shtesë të masave të eficiencës së energjisë janë të padiskutueshme, ato jo gjithmonë mund të maten dhe të kuantifikohen,” thuhet në dokument.
Postimi ” Investimet në ndërtesa për eficiencën deri 2050, 25 mld euro, kursimi kthen koston për 10.6 vjet ” eshte marre nga Revista Monitor.
