Rritja e fluksit turistik por edhe investimeve të vazhdueshme në bregdet kanë nxjerrë në pah nevojën për rritje të kapaciteteve që të përballojnë ngarkesën në pikën e sezonit.
OSHEE parashikon që përmes drejtorisë së saj rajonale në Vlorë të ndërhyje me investime në dy zona, Radhimë dhe Orikum me një kontratë që mban vlerën 532 milionë lekë me TVSH apo rreth 5.3 milionë euro.
Fituesi i kësaj kontrate të nënshkruar në 12 nëntor është kompania KRONOS KONSTRUKSION.
Kompania publike e shpërndarjes së energjisë nënvizon se ky projekt konsiston në ndërtimin e dy fiderave të rinj O1 dhe O2 me parametra 20kV me kabëll gërshet XLPE 3x (1×240)mm2, ndërtimin e 30 kabinave të reja tip box, rikonstruksion të kabinave ekzistuese, ndërtimin e linjës Tension të Ulët kabëll me vetëmbajtje ABC, nga N/ST Orikum i ri 110/35/20 kv. Këto fidera do të mbulojnë zonën e Radhimës duke filluar nga ura e Orikumit deri në Jonufer, duke garantuar furnizimin e pandërprerë me energji elektrike të kësaj zone turistike.
“Është një ndër zonat bregdetare më të frekuentuar gjatë verës i cili se fundmi po karakterizohet nga një zhvillim intensiv dhe këta faktorë kanë bërë që ritmet e rritjes së kërkesës për energji elektrike të jenë mjaft të larta.
Për zonën duhet një rikonstruksion dhe shtim i kapaciteteve të infrastrukturës elektrike të përshtatshme, që të garantojë një shërbim cilësor kundrejt konsumatorëve aktual dhe njëkohësisht të jetë në përputhje me zhvillimet e pritshme afatgjata të zonës” thuhet në dokumentet që shoqëronin procedurën në fazën e shpalljes së saj në sistemin e prokurimit.
Të njëjtat dokumente sqarojnë se fideri i ri O1 do të lidhet në unazë me fiderin Vj1 i cili del nga N/ST Vlora 2 110/20 Kv në kabinën Lefter Sota. Fideri i ri O2 do te lidhet ne unaze me fiderin Vj2 i cili del nga N/ST Vlora 2 110/20 Kv ne kabinën Stacion pompimi Sp7. Sistemi unazor që do të aplikohet në këtë rajon përmes investimit, sipas OSHEE do të mundësojë që ndërprerjet e energjisë në rast avarie të jenë të lokalizuara dhe jo me efekt të gjerë.
“Ky rrjet në rast defekti ose mirëmbajtje bën të mundur ndërprerjen e energjisë vetëm në kabinën e dëmtuar ose që kryhet remont” thuhet në dokument./N.Maho
Postimi ” Investimet në rrjetin energjetik në zonat turistike, 5.3 milionë euro për Radhimë-Orikum ” eshte marre nga Revista Monitor.
