Çmimi i favorshëm, me të cilin Korporata Elektorenergjetike Shqiptare i shet energjisë Operatorit të Sistemit të Transmetimit për mbulimin e humbjeve në rrjet, do të jetë në fuqi deri në 30 qershor të këtij viti. Enti Rregullator i Energjisë ka shtyrë afatin e kontratës së shit-blerjes mes 2 kompanive publike të gjenerimit dhe transmetimit të energjisë, teksa afati i ri përkon me përfundimin e periudhës së emergjencës në furnizimin me energji elektrike, të shpallur nga qeveria.
Sipas marrëveshjes së nënshkruar në datë 29 qershor 2022, çmimi për 1 mWh është i njëjtë me çmimin e blerjes së energjisë nga prodhuesit me përparësi hidrike. Deri në mes të shkurtit, kësaj kategorie energjia i blihej me rreth 73 euro/ mWh, ndërkohë që përmes një vendimi të ri, çmimi në vijim do të jetë 10 lekë/ kWh apo rreth 87 euro/mWh, që janë vlera ndjeshëm më e ulta se tregu. ERE argumenton se shkak për shtyrjen e afatit është bërë vullneti i lirë mes palëve, të cilët kanë dakordësuar aplikimin e çmimeve të ulta edhe për 6 muaj.
Kontrata e lidhur midis kompanive është një favorizim për Operatorin e Sistemit të Transmetimit, që sipas legjislacionit të fuqi kryen blerje me çmime tregu për të mbuluar humbjet në rrjet. Sipas të dhënave zyrtare, gjatë vitit 2022 niveli i humbjeve në rrjetin e transmetimit arriti 2.11%. Ndërkohë që, në 6-mujorin e parë, të vitit të kaluar, kur marrëveshja me KESH nuk kishte hyrë në fuqi, çmimi mesatar me të cilin u ble energjia nga OST për mbulimin e tyre ishte 263.8 euro/mWh.
Ola Mitre/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
