Tatimi i fitimit nga kriza për kompanitë e energjisë, ka nisur diskutimin në Parlament, pak ditë nga përfundimi i vitit. Përfaqësuesit e qeverisë kanë prezantuar projektligjin që shmang fjalën taksë dhe vjen me termin “kontribut solidariteti”.
Sipas demokratëve, ligji është efektivisht një taksë, për sa kohë ajo mblidhet me detyrim, ndërsa sipas deputetit Helidon Bushati, efekti i saj prapaveprues bie në kundërshtim me Kushtetutën.
Përfaqësuesit e qeverisë hodhën poshtë termin tatim dhe papajtueshmërinë me kushtetutën, dukë dhënë edhe shembuj të shteteve europiane që tashmë e kanë marrë një hap të tillë.
Kontributi i solidaritetit do të llogaritet për pjesën e energjisë së shitur mbi 8.5 lekë/kilovatorë, nga prodhuesit e energjisë në tregun e lirë.
Kontributi do të jetë sa gjysma e këtij fitimi të paparashikuar të këtyre kompanive. Qeveria parashikon në buxhet që 8.3 miliardë lekë, apo rreth 72 milionë euro të vilen nga ky kontribut special.
Burimi: A2 CNN
