Inflacioni zbriti muajin e shkuar në nivelin më të ulët, që prej Marsit 2022, duke shënuar nivelin e 5.3%. Kjo është njëkohësisht rënia më e fortë që prej fillimit të krizës së çmimeve.
Ushqimet vazhdojnë të jenë zëri kryesor që po furnizon inflacionin, duke qëndruar 11% më të larta se një vit më parë. Teksa qumështi, bulmetet dhe vezët, ndjekur nga peshku, perimet dhe mishi janë mallrat ushqimorë me rritjen më të madhe.
Ndërsa kategoritë e tjera që qëndrojnë mbi objektivin prej 3% të Bankës së Shqipërisë janë veshjet, mobilimi, argëtimi, akomodimi dhe restorantet, së bashku me shërbimet e tjera.
Një ndikim të madh në rënie e inflacionit ka ardhur prej stabilizimit të çmimeve të energjisë, duke pasur parasysh se karburantet tregtohen sot 7.5% më lirë se fillimi i luftës në Ukrainë.
Një rënie të fortë të inflacionit ka raportuar edhe eurozona, në 6.9% për muajin Mars. Megjithatë, teksa Europa po lehtësohet prej çmimit të energjisë elektrike, produktet ushqimore po shtrenjtohen vazhdimisht. Shqipëria ka një varësi të lartë nga importet për këtë kategori, të cilën po e balancon me rënien e euros në tregun vendas të këmbimit valutor, por sërish do të pengojë uljen e shpejtë e të dëshiruar të inflacionit.
Burimi: A2 CNN
