Autoritetet gjermane po shtojnë masat për shpërndarjen emergjente të parave nëse do të ketë ndërprerje të energjisë elektrike, ndërsa objektivi kryesor është mbajtja e ekonomisë në funksion. Prej disa kohësh Gjermania po përgatitet për ndërprerjet e mundshme të energjisë elektrike si pasojë e luftës në Ukrainë.
Planet e qeverisë përfshijë bankën qendrore, duke grumbulluar miliarda euro të tjera për të përballuar rritjen e kërkesës dhe kufizimet e mundshme në tërheqjen e parave nga bankomatet.
Zyrtarët dhe bankat po përcaktojnë dhe prioritetet për shpërndarjen e parave, duke listuar si një nga pikat kryesore, aksesin në karburant për transportuesit e parave cash, ndërsa bëhet e ditur se përgatitjet janë përshpejtuar javët e fundit sidomos pas ndërprerjes së furnzimit me gaz nga Rusia.
Edhe pse autoritetet gjermane kanë minimizuar publikisht mundësinë e një ndërprerjeje të energjisë elektrike, këto plane tregojnë se sa seriozisht po merret mundësia e një dimri pa energji elektrike, si pasojë e rritjes së kostove por dhe të një sabotimi të mundshëm.
Gjithashtu nënvizohen pasojat gjithnjë në rritje në Gjermani si pasojë e luftës në Ukrainë, duke qenë se vendi prej dekadash varej nga energjia ruse e përballueshme në kosto. Ndërsa aktualisht përballet me inflacion dyshifror dhe kërcënimin e përcarjes si pasojë e mungesës së karburantit dhe energjisë.
Qasja në paratë cash është një shqetësim i rëndësishëm për gjermanët, të cilët vlerësojnë sigurinë dhe anonimitetin që ofron dhe priren ta përdorin atë më shumë se europianët e tjerë, me disa që ende grumbullojnë marka gjermane të zëvendësuara me euro më shumë se dy dekada më parë.
Rreth 60% e blerjeve në vend paguhen me para në dorë, sipas një studimi të fundit të Bundesbank, që tregoi se gjermanët tërheqin më shumë se 6600 euro në vit kryesisht nga ATM-të.
Një raport parlamentar, 10 vjet më parë, paralajmëroi për pakënaqësi dhe zemërim agresiv nëse qytetarët nuk do të ishin më në gjendje të kishin para cash. Pati një kërkesë të madhe për para cash në fillim të pandemisë në mars të 2020-ës, kohë kur gjermanët tërhoqën 20 miliard euro më shumë se sa kishin depozituar. Megjithëse ishte një shifër rekord, cdo gjë funksionoi pa probleme.
Por një ndërprerje e mundshme e shpërndarjes së parave cash, ngre pyetje të tjera rreth skenarëve të mundshëm dhe zyrtarët po analizojnë me shumë kujdes situatën ndërsa kriza energjitike në ekonominë më të madhe të Europës po thellohet dhe dimri po bëhet më i ashpër. Në një rast të tillë, burime anonime nga qeveria konfirmojnë se do të vendoset një kufi për shumën e parave që njerëzit mund të tërheqin.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
