Enti Rregullator i Energjisë ka publikuar një studim mbi konsumin e energjisë elektrike dhe sjelljen konsumatore, duke kryer vlerësime mbi mundësinë e kursimit. Në këtë kuadër, janë nxjerrë të dhëna konkrete edhe mbi sistemet e matjes inteligjente, që gjithsesi në vendin tonë mbeten të kufizuar.
Këto sisteme mundësojnë merrjen e informacionit rreth konsuimit të energjisë, fuqisë në kohë reale, duke u proçesuar më pas në një platformë menaxhimi të këtyre të dhënave. ERE ka marrë në studim projektin “pilot” të zhvilluar nga OSSH, në fiderin F7 dhe F8 të zonës së Kasharit, ndërsa sipas të dhënave rezulton se këta matës mundësuan reduktimin e humbjeve në shpërndarje të energjisë elektrike të asaj zone përgjegjësie, duke shkuar në nivelin e standardeve dhe normave të lejuara në rreth 7,5 %.
Teksa vlerëson mundësitë që ofrojnë sistemi i matjes Smart, ERE nxjerr në pah përfitimet që vijnë për konsumatorët familjarë. “Nëse instalimi i Matësave inteligjentë çon në një reduktim të konsumit të energjisë elektrike, ai do të rrisë të ardhurat e disponueshme të konsumatorit, të cilat më pas mund të përdoren për të blerë mallra ose shërbime të tjera që kërkojnë energji”, – thuhet ndër të tjera në studim.
Po ashtu, kjo mund të çojë në mundësi të reja që mund të kanalizohen në një llogari që mund të financojë rinovimin e shtëpisë ose masa të tjera të Efiçencës së Energjisë, të cilat më pas do të ofronin përfitime të mëtejshme, duke gjeneruar në thelb një reagim pozitiv për kursimin e energjisë. Gjithsesi, sipas ERE-s, janë një sërë faktorësh që lidhen me reduktimin e energjisë elektrike të konsumatorit, që ndikojnë nëse politika e Smart Meter do të jetë e suksesshme.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
