Buxheti për sektorin e drejtësisë parashikohet në 26.2 mld lekë për vitin 2024 apo 2-fish më shumë në krahasim me vitin 2016, kohë kur nisi reforma në drejtësi. Mbështetja buxhetore ka ardhur në rritje çdo vit, teksa vetëm në raport me vitin 2023 janë vendosur në dispozicion 4.2 mld lekë më shumë. Gjatë prezantimit të projektbuxhetit në Komisionin Parlamentar të Ligjeve, ministri i Financave dhe Ekonomisë, Ervin Mete i konsideroi shifrat si mbështetje financiare për reformën në drejtësi.
Këto shifra reflektojnë mbështetjen financiare për ngritjen dhe funksionimin e institucioneve të reja të reformës në drejtësi, ku përfshihen institucionet e Vettingut, të Strukturës së Posaçme kundër Korrupsionit dhe Krimit të Organizuar, të Këshillit të Lartë të Drejtësisë, reformimin e institucioneve të sistemit të akuzës dhe sistemit gjyqësor, të inspektoriatit të Lartë të Drejtësisë, Shkollës së Magjistraturës, si edhe reformimin e institucioneve të tjera të varësisë së Ministrisë së Drejtësisë.
Pjesa më e madhe apo 61% e buxhetit të parashikuar do të shkojë për pagat e punonjësve të sistemit të drejtësisë.
Shpenzimet e personelit për punonjësit e sistemit të drejtësisë parashikohen të jenë 16 miliardë lekë, ose 9 miliardë lekë më shumë se në vitin 2016. Rritja e ndjeshme e fondit ndër vite reflekton jo vetëm rritjen e numrit të burimeve njerëzore, por edhe rritjen e pagave për punonjësit e këtyre institucioneve. Për vitin 2024, shpenzimet e personelit për të gjitha institucione e sistemit të drejtësisë janë rritur me 3.1 miliardë lekë, krahasuar me buxhetin fillestar për vitin 2023. Kjo rritje i dedikohet efektit financiar të reformës së pagave të nisur në vitin 2023. Nga ky fond 1.4 miliardë lekë janë akorduar vetëm për magjistratët.
Paralelisht, janë parashikuar edhe investime, që kapin vlerën e 2.3 mld lekëve e që përfshijnë ndërhyrje në godina dhe pajisje teknologjike.
Për SPAK mbështeten me 550 milionë lekë projektet e reja infrastrukturore dhe pajisjet teknologjike, të cilat parashikohen të implementohen në vitet 2024-2025; Implementimi dhe Përmirësimi i sistemit të regjistrit elektronik noterial, me vlerë rreth 234 milionë lekë; Investime për përmirësimin e infrastrukturës në mjekësinë ligjore dhe laboratorin e toksikologjisë; Financime për përmirësimin e infrastrukturës së Gjykatës Kushtetuese dhe Prokurorisë Tiranë; Rikonstruksioni i Gjykatës Kushtetuese, me vlerë 20 milionë lekë; Arkiva Digjitale për Këshillin e Lartë të Prokurorisë;
Shpenzimet operative dhe të mirëmbajtjes në vitin 2024 parashikohen në masën 8 miliardë lekë, ndërsasipas ministrit kanë adresuar nevojat e të gjitha institucioneve për të siguruar realizimin optimal të veprimtarisë funksionale të tyre.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
