Përveç kredisë prej 110.8 mln euro, një tjetër hua nga Banka Ndërkombëtare për Rindërtim dhe Zhvillim është marrë nga qeveria shqiptare. Marrëveshja ka mbërritur në Kuvend për diskutim, ndërsa parashikon marrjen e një borxhi prej 51.6 mln euro për ndërtimin e urave.
Sipas relacionit shoqërues, qëllimi është akomodimi i financimit për implementimin e studimeve të fizibilitetit dhe projekteve të detajuara për rikonstruksione të thella dhe të mesme të urave ekzistuese, urave të reja dhe veprave të artit në rrjetin rrugor kombëtar, që janë më të rrezikuara nga faktorët madhorë, si tërmetet, përmbytjet apo ndryshimet klimatike. Edhe kjo hua përbëhet nga 3 komponentë. Komponenti i parë do të financojë rehabilitimin ose rindërtimin e urave prioritare.
Urat prioritare do të zgjidhen, bazuar në: rëndësinë social-ekonomike, vendndodhjen e tyre përgjatë korridoreve kryesore ekonomike dhe tregtare ose lidhjes së popullsisë vulnerabël me shërbimet publike, vendet e punës dhe qendrat e tregut. Komponenti i dytë përfshin ngritjen e kapaciteteve institucionale për të garantuar qëndrueshmërinë e investimeve të kryera në komponentin 1. Këtu përfshihet financimi i aktiviteteve që synojnë forcimin e kapaciteteve të Autoriteti Rrugor Shqiptar në menaxhimin e aseteve të urave. Ndërkohë që, komponenti i tretë përfshin menaxhimin e projektit.
Duke pasur parasysh kapacitetet teknike aktuale të ARRSH-së në lidhje me urat dhe tombinat, ky komponent do të financojë gjithashtu shërbimet e asistencës teknike të një ekipi ekspertësh të urave për t’i mbështetur ata në përgatitjen e 4 specifikimeve teknike, prokurimin dhe trajnimin e ekipit të Autoritetit Rrugor Shqiptar. Afati i fundit i zbatimit të projektit është 31 korrik 2029.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
