Qeveria shqiptare ka depozituar në Kuvend për ratifikim marrëveshjen e huasë 60 milionë euro me Bankën Ndërkombëtare për Rindërtim dhe Zhvillim. Qëllimi I kësaj huaje është përmirësimi i aksesit të barabartë në shërbimet publike të standardit të lartë nëpërmjet operacionit Govtech.
Programi synon përmirësimin e portalit “e-Albania” dhe infrastrukturave mbështetëse të tij, duke sjellë funksionalitete të reja për qytetarët dhe bizneset në përfitimin e shërbimeve publike (të cilat tashmë ofrohen në masën 95% vetëm on-line në “e-Albania”), si dhe investimin në rritjen e aftësive bazë dhe atyre të avancuara digjitale për popullatën.
Huaja që akordohet nga Banka Ndërkombëtare për Rindërtim dhe Zhvillim në vlerën 60 milionë euro do të ketë një normë interesi të bazuar në normën e referencës euribor + marzh të pandryshueshëm 1.17%.
Kjo hua ka një afat maturimi 18 vite, duke përfshirë periudhën prej 5 vjetësh, pa pagesë principali.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
