Numri total i konsumatorëve që mbajnë statusin e vetëprodhuesit të energjisë elektrike arriti në 1,249 deri në qershor të këtij viti, ndërkohë që kapaciteti total i instaluar nga kjo kategori shkoi në 119,050 kW. Të dhënat raportohen nga Sekretariati i Komunitetit të Energjisë, duke treguar një rritje të ndjeshme të impianteve të instaluar, jo vetëm gjatë vitit që lamë pas, por edhe gjatë 6-mujorit të parë të këtij viti. Numri i konsumatorëve që kishte interes për të instaluar panele diellore pësoi një rritje të ndjeshme, kryesisht nga bizneset si pasojë e shtrenjtimit të energjisë elektrike vitin që shkoi.
Ndërkaq, në raport me vendet e rajonit, Shqipëria lihet pas vetëm nga Maqedonia e Veriut, që ka kapacitetin më të lartë të instaluar e më konkretisht 129,700 kw. E treta renditet Serbia e më pas Mali i Zi, Kosova dhe Bosnje Hercegovina. Sipas Sekretariatit të Komunitetit të Energjisë, shumica e vendeve kanë kufizuar kapacitetin e lejuar për t’u instaluar, duke e justifikuar atë me nevojën për të ruajtur stabilitetin dhe besueshmërinë e sistemit të energjisë elektrike.
Në Shqipëri, ky kapacitet është 500 kW. Ndërkaq, sipas Sektretariatit, Shqipëria duhet të kalojë në faturimin neto për vetëprodhimin e energjisw nga burimet e rinovueshme, duke filluar nga 1 janari 2024. Faturimi neto është një mekanizëm faturimi që lejon një konsumator të marrë një vlerë monetare të llogaritur duke u bazuar në vlerën neto të energjisë elektrike të konsumuar nga rrjeti dhe vlerës të energjisë elektrike të futur në rrjet, brenda një periudhe kontabël.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
