Qeveria shqiptare nuk humb kohë. Marrëveshja e firmosur me Italinë për njohjen reciproke të pensioneve, pritet të kalojë për miratim në seancën plenare të 22 shkurtit.
Pas ratifikimit në Parlament do të bëhet edhe botimi në Fletoren Zyrtare. Ndërkohë, për të nisur funksionimin, emigrantët shqiptarë, që jetojnë në Itali do të duhet të presin edhe disa javë të tjera, pasi marrëveshja për të qenë aktive do të duhet të kalojë edhe në Parlamentin Italian, përkatësisht në Senat dhe Dhomën e Deputetëve.
Gjatë kësaj periudhe përcaktohen edhe modalitetet mbi mënyrën sesi do të funksionojë, rolin e institucioneve dhe praktikën që do të duhet të ndiqet. Në një intervistë dhënë pak ditë më parë për Scan Tv, zv.ministrja e Ekonomisë Olta Manjani tha se pas hyrjes në fuqi të marrëveshjes, qytetarët të cilët janë në prag pensioni mund të aplikojnë pranë Institutit të Sigurimeve Shoqërore në Itali pa qenë nevoja të vinë në Shqipëri. Do të jetë pikërisht ky institucion, që do të koordinojë punën me Institutin e Sigurimeve në Shqipëri, brenda afateve që do të përcaktohen.
Marrëveshja parashikon njohje të periudhave kontributive për efekt pensioni. Në këtë mënyrë, një emigrant që ka 10 vite pune në Itali dhe 15 vite pune në Shqipëri do të përfitojë pension në të dyja vendet, për vitet e punës që ka. Ç’ka do të thotë se do të marrë pension pleqërie në Shqipëri për 15 vite dhe në Itali për 10 vite.
Janë rreth 200 mijë emigrantë shqiptarë, që do të përfitojnë nga marrëveshja, të cilët pas finalizimit të saj, do t’ju krijohet mundësia edhe e transferimit të pensionit në Itali.
Ada Hazizolli /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
