Shtrenjtimi i pjesëve të këmbimit është pasyqruar në kostot e dëmeve që mbulojnë kompanitë e sigurimeve për riparimin e mjeteve të përfshira në aksidente. Në janar 2023, dëmet e paguara nga kompanitë e sigurimeve për llogari të mjeteve të aksidentuara kapën vlerën 350 milionë lekë, afërsisht 3.5 milionë dollarë, duke pësuar një rritje me rreth 18 % krahasuar me të njëjtën periudhë të një viti më parë. Kompanitë e sigurimeve të pyetura nga Scan Televizion e lidhën këtë rritje të dëmshpërblimeve me shtrenjtimin e pjesëve të këmbimit në tregjet e huaja, por edhe me rritjen e pagave në vend.
Ndërkaq, rritje kanë shënuar edhe primet e sigurimit të automjeteve, por me ritëm më të ulët se dëmet. Sipas të dhënave zyrtare të Autoritetit të Mbikqyrjes Financiare, Primet e sigurimit të detyrueshëm motorik, gjatë muajit janar 2023 arritën rreth 955 milionë lekë, afërisht 10 milionë dollarë, rreth 11.46% më shumë se në periudhën janar 2022.
Produkti MTPL e brendshme, në periudhën janar 2023, pati një rritje prej 9.47% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 10.44% krahasuar me të njëjtën periudhë të një viti më parë.
Produkti Karton Jeshil në periudhën janar 2023 pati një rritje prej 25.56% të vëllimit të primeve të shkruara bruto. Kjo u shoqërua nga një rritje të numrit të kontratave prej 100.64% krahasuar me periudhën janar 2022.
Ndërkaq produkti Sigurim Kufitar, në periudhën janar 2023, pati një rritje 4.39% të vëllimit të primeve të shkruara bruto krahasuar me periudhën janar 2022. Edhe numri i kontratave u rrit me 10.58%.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.