Viti 2023 ka nisur pozitivisht për buxhetin e shtetit pasi të ardhurat e mbledhura janë me afro 10 për qind krahasimisht me 2022. Referuar të dhënave zyrtare nga Ministria e Financave, në Janar të ardhurat totale u regjistruan në afro 440 milionë euro dhe tatimi i paguar, llogaritur mbi të ardhurat personale të qytetarëve shqiptarë ka pasur rritjen më të lartë, duke lënë pas edhe kontributin e dhënë nga TVSH si pasojë e çmimeve të rritura.
Konkretisht, në Janar 2022 tatimi mbi të ardhurat personale ka kontribuar 30.5 për qind më shumë se Janari 2022. E thënë ndryshe, nga ky zë buxheti i shtetit ka arkëtuar në muajin e parë të vitit, 5.2 miliardë lekë apo rreth 46 milionë euro nga 35.2 milionë euro të arkëtuara në të njëjtën periudhë të vitit të kaluar.
Në zërin e tatimit mbi të ardhurat personale kontributin më të lartë e jep tatimi mbi pagat e punonjësve në sektorin privat dhe publik, e ndjekur nga tatimi i paguar nga shitja e pasurive të paluajtshme i cili është në nivelin 15 për qind si dhe tatimi mbi qiratë.
Po ashtu një hapësire të konsiderueshme zë tatimi mbi të ardhurat nga dividendët dhe si dhe tatimi mbi të ardhurat nga interesat. Tatimi mbi të ardhurat personale është zëri më i dytë me më ndikim në buxhetin vjetor të shtetit, pas TVSH-së dhe përbën afro 26.7% të totalit të të ardhurave tatimore. Në vitin 2022, nga ky zë u mblodhën në total 50.7 miliardë lekë apo afro 7 miliardë lekë më shumë se një vit më parë.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
