Brenda pak ditësh do të dalin çmimet e reja të referencës, deklaroi kryeministri Rama, ndërsa shtoi se risi do të jetë që taksa për shtëpinë e dytë do të jetë më e madhe se e para.
“Punë ditësh ose javësh, do dalin çmimet e reja të referencës. Do kenë dhe një element tjetër të ri, që taksa për shtëpinë e dytë do jetë më e madhe sesa për shtëpinë e parë. Kështu që, bashkitë, sidomos ato të bregdetit, do ketë një të ardhur të shtuar nga ky proces pasi shumë njerëz në bregdet kanë shtëpitë e dyta.
Por, nga ana tjetër, duke marrë parasysh që çmimet e referencës rritën në mënyrë të konsiderueshme dhe e bëjnë jo të vogël taksën e pasurisë, që do të thotë se kush do ta menaxhojë taksën e pasurisë mirë do ketë të ardhura shumë më tepër, sepse ajo është baza kryesore në të gjithë bashkitë e botës.
Një gjë duhet patur parasysh se në disa bashki kemi taksa lokale eksesive, gjë që nuk na bën sens. Ne e kemi bërë zero taksën e biznesit të vogël, por në disa bashki taksa e tavolinës psh apo të tjera. ka edhe raste ekstravagante fare i këtyre që merren me miniera apo investime në energji iu vënë taksa lokale të çuditshme por edhe këtu duhet patur parasysh që të ketë një lloj sensi dhe kuptimi dhe për këtë besoj se ministria e Financave do të na japë një udhërrëfyes”, u shpreh kryeministri Rama.
Ministri i Financave Petrit Malaj deklaroi se paralelisht me taksën do të prezantohet edhe rivlerësimi i pronave.
“Ne jemi drejt finalizimit të çmimeve të reja të referencës. Paralelisht vlera e pronave është rritur rreth 26%. Pra është një rritje që do të shtojë edhe vlerën për sa i përkthehet të ardhurave më bashkitë. Taksa e pronës është një nga taksat më të rëndësishme në bashkitë e Europës, duhet të zë të njëjtën peshë edhe në vendin tonë. Paralelisht që me taksën ne do të bëjmë prezantimin e rivlerësimit të pronave, që do të bëhet me një normë tatimore të reduktuar. Kështu që do t’iu japim mundësi të gjithë qytetarëve shqiptarë, që krahas vlerës së re të pronave të tyre të bëjnë dhe rivlerësimin e pronave që kanë aktualisht”, deklaroi ministri.
Postimi ” Rama: Do të dalin çmimet e reja të referencës; Taksa për shtëpinë e dytë më e madhe se e para ” eshte marre nga Revista Monitor.
