Ledina Elezi/
Në 12 muajt e fundit ka pasur një rritje të kërkesës për kredi konsumatore në institucionet financiare jo banka, sidomos nga individët që nuk e marrin pagën e tyre përmes bankave të nivelit të dytë.
Sipas një studimi të kryer nga Shoqata Shqiptare e Mikrofinancës, personat që punojnë në informalitet, pra që nuk përfitojnë sigurime shoqërore dhe shëndetësore, të cilët në shumicën e rasteve kanë edhe të ardhura më të ulëta, janë gjithashtu ndër ata që aplikojnë më tepër për kredi në institucionet financiare jobanka.
Rreth 52% e të pyeturve në këtë studim kanë raportuar se punonin në ekonominë informale, që nënkupton se për shkak të mungesës së dokumentacionit të ardhurave ose të ardhurave të ulëta, shumica e pjesëmarrësve përballeshin me vështirësi për të marrë financim nga bankat tradicionale.
Ky përjashtim nga sistemi bankar tradicional, ka shtyrë shumë qytetarë që të kërkonin borxh nga familja ose miqtë, apo të mbështeteshin në institucionet e mikrofinancës, ndërsa shumë pak përdornin burime alternative si overdrafti ose huatë informale.
Por, cilët janë faktorët e tjerë që tërheqin individët për të marrë kredi në institucionet financiare jo banka?
Rehatia dhe shpejtësia e kredive mikrofinanciare, miratimi i menjëhershëm, kërkesat minimale për dokumentacion, shpesh vetëm me një kartë identiteti, si dhe afërsia e degëve të mikrofinancës shihen si faktorë kryesorë për zgjedhjen e këtij produkti financiar.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
