Elisabeta Dosku/
Rritja e perfomancës së të ardhurave në buxhet dhe rialokimet që u bënë me anë të aktit normativ, nuk prekën fondin e parashikuar për indeksimin e pensioneve dhe as për bonusin e pensionistëve.
Referuar aktit normativ për ndryshime në buxhet , fondi për indeksimin e pensioneve është parashikuar në 4.137 milionë lekë dhe bonusi i pensionistëve 3. 650 milionë lekë. Fond ndahet midis skemave, sipas përcaktimeve në vendimin e Këshillit të Ministrave.
Por pavarësisht se numri i përfituesve në skemë në gjysmën e dytë të vitit është rritur, fondi i parashikuar është i njëjtë si në buxhetin fillestar dhe nuk ka ndryshuar. Sipas ligjit, indeksimi i pensioneve bëhet në muajin Tetor, ndërsa bonusi shpërndahet në festat e fundvitit.
Numri i pensionistëve që përfitojnë trajtim financiarë nga skema e sigurimeve shoqërore është rritur ndjeshëm në gjysmën e parë të vitit. Të dhënat zyrtare nga Instituti i Sigurimeve Shoqërore, të siguruara nga ScanTv, bëjnë me dije se deri në Qershor 2023, numri i pensionistëve përfitues ka arritur në 713.333 individë, me një rritje prej 8334 përfitues më shumë se fundviti që lamë pas.
Ndërsa totali i përfituesve nga skema e sigurimeve shoqërore në fund të Qershorit 2024 rezulton 796.563 me një rritje prej 7136 përfitues në raport me Dhjetorin 2024.
Qeveria po përgatitet që në bashkëpunim me Bankën Botërore dhe Fondin Monetar Ndërkombëtar të reformojë sërish skemën e pensioneve me qëllim rritjen e mbështetjes financiare për pensionistët dhe për të amortizuar diferencën e madhe që ekziston midis pensioneve të lidhura para vitit 2015 kur u ndërmor reforma e parë, dhe atyre e lidhura pas saj, të cilat janë më të larta. Një nga diskutimet është alokimi i indeksimit, pasi aktualisht indeksohet totali që marrin pensionistet dhe formati i indeksimit të çdo elementi të pensionit do dojë një rishikim.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
