Shirat kanë rritur prurjet në Kaskadën e Lumit Drin, teksa Korporata Elektroenergjetike Shqiptare ka hapur portat e shkarkimit. Në një prononcim për TV , KESH deklaroi se portat janë hapur në zbatim të Rregullores së trajtimit të plotave në kaskadë si dhe Vendimeve të Komisionit të Posaçëm të Trajtimit të Plotave, ndërkohë që, pritet që intensiteti më i lartë i reshjeve të konkretizohet në datat 18-19 Janar.
“Situata në kaskadë po ndiqet në dinamikë. KESH përtej menaxhimit të prurjeve do të kujdeset gjithashtu edhe për minimizimin e impaktit negativ që mund të kenë prurjet në zonën e nën Shkodrës”, – tha Korporata, teksa nuk bëri me dije nivelin e ujin në liqenet e Fierzës, Komanint dhe Vaut të Dejës.
Ndërkaq, situata e favorshme hidrike ka sjellë përmirësim të situatës elektroenergjetike, teksa rezerva energjetike sipas KESH është 1190 GWh. Pak ditë më parë u realizua dhe një tender për shitje energjie, duke i siguruar Korporatës rreth 6 mln euro të ardhura.
Ndërkaq, teksa pritet një rritje e intesitetit të reshjeve, ende nuk është përcaktuar nëse do të ketë procedura të tjera të shitjes së energjisë. “Bazuar në menaxhimin e prurjeve do të vlerësohen edhe mundësitë në vijim të prodhimit dhe tregtimit”, – bëri me dije KESH.
Kushtet e favorshme hidrike shoqërohen me ndalimin e importeve të energjisë, me qëllim plotësimin e nevojave konsumatore, duke përmirësuar situatën financiare të shoqërisë, që shpenzoi vitin e kaluar mbi 350 mln euro për blerjen e energjisë.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
