Administrata tatimore ka ndëshkuar 800 biznese për shkelje të ndryshme të legjislacionit tatimor përgjatë vitit 2022. Referuar të dhënave zyrtare nga Drejtoria e Përgjithshme e Tatimeve, lista e shkeljeve kryesohet nga mosinstalimi i sistemit të fiskalizimit, për të cilin janë penalizuar 317 tatimpagues apo 35 për qind të totalit të shkeljeve, ku biznesi i madh ka rezultuar si më problematiku në këtë drejtim.
136 tatimpagues janë penalizuar pasi janë konstatuar me punonjës të padeklaruar, nga të cilët 43 subjekte janë të përgjegjësisë tatimore “biznes i madh” dhe 93 subjekte janë të përgjegjësisë tatimore “biznes i vogël”; 116 subjekte të paregjistruara në organin tatimor; 110 tatimpagues janë konstatuar se dispononin mallra pa dokumentacion tatimor, ku sërish numri më i lartë i të ndëshkuarve është në radhët e biznesit të madh.
Ndërsa, 92 tatimpagues janë penalizuar për moslëshim të faturës tatimore dhe 29 tatimpagues janë penalizuar pas zhbllokimit si aktivitete të paregjistruar. Administrata tatimore ka konstatuar gjithashtu 122 shkelje të tjera të legjislacionit tatimor. Vlera totale e shkeljeve arrin në 50 milionë lekë apo 434 mijë euro.
E ndarë sipas rajoneve, vlera më e madhe e shkeljeve regjistrohet në rajonin qendror, me 21 milionë lekë, e ndjekur nga Drejtoria e Përgjithshme e Tatimeve, Rajoni Jugor dhe në fund është rajoni verior. Gjatë vitit që lamë pas është vënë në jetë edhe reforma antiinformalitet, e cila targetoi kryesisht nëndeklaimin e pagave në sektorë të ndryshëm të ekonomisë.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
