5 shoqëri kanë shprehur interes për të marrë pjesë në garën që do të hapë Korporata Elektroenergjetike Shqiptare për blerjen e karburantit, që do të përdoret për 2 TEC-et lundures. KESH bëri me dije për TV se periudha e pritshme e publikimit të garës është muaji maj 2023, ndërkohë që emrat e subjekteve të interesuar, nuk u bënë publike.
“Me qëllim menaxhimin e procesit konkurrues që do të publikohet se shpejti dhe mosekzpozimin e interesave tregtare në tregjet e lëndëve hidrokarbure, emrat e subjekteve pjesëmarrëse do të bëhen të njohur vetëm pasi të jetë përfunduar procesi i konkurrimit”, – tha KESH në një përgjigje me shkrim.
Po ashtu, ndonëse planifikon të hapë së shpejti garën tenderuese, Korporata nuk iu përgjigj interesit të TV mbi fondin limit dhe sasinë e lëndës djegëse që do të prokurohet. Gjithsesi, sasia minimale që do të dorëohet nga kompania fituse është 100 mijë ton në vit.
Kërkesa paraprake u hap pak kohë më parë, ndërsa sipas KESH synonte mbledhjen e shprehjeve të mundshme të interesit nga pjesëmarrësit e tregut për furnizimin e një sasie karburanti për asetet lundruese të energjisë, për një afat kohor prej 2 vitesh. Çmimi i karburantit që do të dalë nga kjo procedurë është një nga hallkat kryesore për të përcaktuar koston finale, me të cilën do të prodhohet energjia nga 2 gjeneruesit Tigri 1 dhe Tigri 2.
Deri më tani është bërë e ditur vetëm qiraja ditore, si dhe kostot e operimit dhe mirëmbajtjes, me një totale prej 94 500 USD. Impiantet u tenderuan përmes një procedure emergjente në kuadër të krizës energjetike mbi 1 vit më pare, por deri më tani ato nuk janë vënë në punë.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
