Korporata Elektroenergjetike Shqiptare ka siguruar rreth 2.7 mln euro nga procedura e shitjes së energjisë, zhvilluar një ditë më parë. Në total janë shitur 13 260 mWh energji, teksa çmimi me të cilin është shitur energjia varion nga 116 në 246 euro/ mWh.
Ky çmim është ndjeshëm më i lartë se ai me të cilin u shit energjia pak ditë më parë. Sipas përllogaritjeve të TV , në tenderin e zhvilluar ditën e hënë, energjia u shit 150% më lirë se çmimet në tregjet ndërkombëtare.
Çmimi i transaksioneve varionte nga 73 në 101 euro/mWh, teksa çmimet në Bursën e Hungarisë, që shërben si referencë për transaksionet në vendin tonë pësuan rritje me gati 20% në sesionin e të hënës, duke arritur në gati 250 euro/mWh. Ndërkaq, në shitjen e fundit çmimet duket se ecin në të njëjtën linjë me bursën hungareze, duke mundësuar përfitime më të larta për KESH.
Paralelisht me shitje, reshjet e shiut kanë favorizuar edhe depozitimin e energjisë. Sipas njoftimit të KESH është mundur të depozitohet një sasi prej 14 700 mWh, që do t’i kthehet korporatës në periudhë 1 – 30 qershor 2023.
Një procedurë e ngjashme u shpall edhe më herët, por rezultoi e pasukseshme, ndërsa asnjë shpjegim nuk është dhënë nga institucionet në këtë drejtim. Zyrtarisht, qeveria pohoi të mërkurën se shkarimet e ujit janë ndalur në hidrocentralin e Komanit, ndërsa vazhdojnë në hidrocentralin e Vaut të Dejës.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
