Ledina Elezi/
Më pak biznese po marrin hua në euro për të investuar në instrumente financiare, ndikuar kjo edhe nga zhvlerësimi i monedhës evropiane. Referuar të dhënave nga Banka e Shqipërisë, deri në fund të muajit korrik të këtij viti, vlera e huave të marra nga bizneset për të investuar në instrumente financiare kapte shifrën 58 milionë lekë, ndërsa kredia e marrë në euro ishte 278 milionë, duke shënuar rënie me 3 milionë krahasuar me muajin qershor. Nga ana tjetër, huaja e aprovuar në monedhën vendase ka ruajtur të njëjtat vlera si në muajin qershor.
Rreth 499 milionë euro është vlera më e lartë e kredive të aprovuara nga bankat për bizneset me qëllim investimi në instrumente financiare, e regjistruar në muajin dhjetor 2023. Ndërsa që prej muajit janar të këtij viti, ku totali i huasë arrinte në 409 milionë, vërehet një tendencë rënëse në vlerë.
Huatë për investime në instrumente financiare i referohen përdorimit të parave të kredisë për të investuar në aktive si aksione, obligacione, fonde të përbashkëta apo produkte të tjera financiare. Bizneset blejnë aktive investimi me synimin që kthimet nga këto investime do të tejkalojnë koston e kredisë, përfshirë interesin.
Këto kredi mund t’u ofrojnë bizneseve kapital shtesë për mundësi investimi dhe shtuar burimet e të ardhurave. Kjo strategji mund të zgjerojë fitimet e mundshme, por gjithashtu rrit rrezikun, pasi kredia duhet shlyer pavarësisht se si do të performojnë investimet. Pra, nëse investimet nuk japin fitimet e parashikuara, biznesi mund të përballet me vështirësi financiare duke përfshirë detyrime më të larta borxhi dhe ndikime në fluksin e parasë.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
