Nga 1 janari, 2104 biznese të lidhur në tensionin 20 kv nuk do të furnizohen më nga Furnizuesi i Shërbimit Universal, çka do të thotë se do të duhet të zgjedhin vetë furnizuesin e tyre për energjinë elektrike.
Kjo do të thotë se ata do të duhet të lidhin një kontratë shërbimi me një nga kompanitë e licencuara nga Enti Rregullator i Energjisë në veprimtarinë e furnizimit me energji elektrike. Aktualisht janë 34 kompani të licencuara për të ushtruar këtë aktivitet, ndërkohë që një prej tyre është edhe Furnizuesi i Tregut të Lirë, pjesë e OSHEE-së.
Bizneset do të duhet të zgjedhin një prej kompanive furnizuese, me të cilën do të lidhin një kontratë ku ndër të tjera do të vendosin edhe çmimin me të cilin do të sigurohet energjia. Kjo pasi sipas legjislacionit në fuqi furnizimi me energji elektrike i klientëve fundorë bëhet me çmime të parregulluara, i cili përcaktohet në bazë të kontratave të negociuara ndërmjet furnizuesit dhe klientit fundor.
Kontrata, mund të përmbajë edhe kushte të tjera në varësi të karakterit specifik dhe llojit të shërbimit të ofruar nga furnizuesi sikurse është koha e lidhjes në rrjet të klientit, nivelet e cilësisë së shërbimit të ofruar, parashikimet lidhur me kompensimin dhe rimbursimin, në rast mospërmbushjeje të nivelit të cilësisë së shërbimit të kontraktuar, etj.
2104 bizneset që janë pjesë e listës së publikuar nga OSHEE dolën në tregun e liberalizuar që në vitin 2022, por për shkak të çmimeve të larta si pasojë e krizës, ata u përfshinë në një skemë, duke përfituar çmime më të favorshme se tregu.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.