Qeveria ka rishikuar më rritje nga 7.5 miliardë lekë kahun e të ardhurave dhe shpenzimeve buxhetin e shtetit. Sipas aktit normativ për ndryshime në ligjin e buxhetit për vitin 2023 të botuar në Fletoren Zyrtare, të ardhurat për vitin 2023 planifikohen në 650.1 miliardë lekë, shpenzimet në 705.6 miliardë lekë dhe deficiti në 55.5 miliardë lekë.
Sipas aktit normativ, fondi i rindërtimit për përballimin e pasojave të tërmetit të vitit 2019, nga 5 miliardë lekë që ishte planifikuar për të përballuar kostot për projektet e miratuara dhe të pafinancuara të viteve të mëparshme dhe pjesa e mbetur për projekte të reja, rritet në 17 miliardë lekë.
Qeveria ka rritur çuar në 250 milionë lekë, nga 100 milionë fondin i parashikuar në programin buxhetor “Ekzekutimi i pagesave të ndryshme” në Ministrinë e Financave dhe Ekonomisë, i cili përdoret për parafinancimin, bashkëfinancimin dhe pagesën e tatimit mbi vlerën e shtuar dhe të detyrimeve doganore për projektet me financim të huaj.
Është rritur po ashtu fondi rezerve me 300 milionë lekë, duke u regjistruar në 3.8 miliardë lekë, ku 2 miliardë lekë do të përdoren për raste të paparashikuara të njësive të qeverisjes së përgjithshme dhe 1.8 miliardë lekë, për përballimin e kostos së zgjedhjeve.
Qeveria ka rritur edhe kufirin e stokut të borxhit me afro 20.4 miliardë lekë. Në akt normativ thuhet se, kufiri për rritjen vjetore të totalit ekzistues të stokut të borxhit të qeverisjes qendrore dhe atij të garantuar të qeverisjes qendrore në dobi të palëve të treta përfituese për vitin 2023, pa përfshirë efektet e mundshme prej ndryshimit të kursit të këmbimit, është deri në 74.9 miliardë lekë.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
