Projektbuxheti i shtetit për vitin 2024 dhe paketa fiskale janë depozituar për diskutime në komisione parlamentare, ndërkohë që u prezantua në dy ditë më parë nga Ministri i Financave Ervin Mete në Konferencën e Kryetarëve dhe në Komisionin e Ekonomisë, i cili ka theksuar se drafti orientohet drejt mirëqenies dhe ka në fokus rritjen e pagave në sektorin publik, investimet publike si dhe mbrojtjen sociale.
Por cilat janë etapat që do të ndjekë drafti deri në miratimin e tij për ti hapur rrugë edhe hyrjes në fuqi? Referuar kalendarit të Kuvendit për shqyrtimin e projektligjit për “Buxhetin 2024”, të miratuar në Konferencën e Kryetarëve, nga dita e Hënë dhe deri më 17 Nëntor parashikohet që shqyrtimi në parim i paketës fiskale dhe i projektligjit “Për buxhetin e vitit 2024” në komisionet e përhershme. Komisionet për dhënie mendimi duhet të dorëzojnë në Komisionin për Ekonominë dhe Financat raportet për shqyrtimin në parim të paketës fiskale dhe projektbuxhetit për vitin 2024 brenda datës 15 nëntor 2023.
Më datën 20 dhe 21 Nëntor 2023 është programuar shqyrtimi në parim në seancë plenare i paketës fiskale dhe i projektligjit “Për buxhetin e vitit 2024”.
Nga data 22 nëntor deri më 30 nëntor do të bëhet shqyrtimi nen për nen i paketës fiskale dhe i projektligjit “Për buxhetin e vitit 2024” në komisionet e përhershme., ku do të ketë dëgjesa edhe me grupet e interesit. Komisionet për dhënie mendimi dorëzojnë në Komisionin për Ekonominë dhe Financat raportet për draftet brenda datës 27 nëntor 2023.
Ndërsa më 7 dhjetor programohet të jetë shqyrtimi nen për nen dhe në tërësi në seancë plenare i paketës fiskale dhe projektligjit “Për buxhetin e vitit 2024” dhe më tej miratimi i tyre. Të ardhurat në projektbuxhet për vitin 2024 parashikohen në 674.7 miliardë lekë, shpenzimet në nivelin 735.9 miliardë lekë dhe deficiti buxhetor 55.3 miliardë lekë.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
