Korporata Elektroenergjetike Shqiptare synon të menaxhojë Kaskadën e Drinit përmes inteligjencës artificiale. Ky dikaster ka hapur një tender me vlerë 250 mln lekë për ngritjen e një sistemi online që mundëson parashikimin e flukseve hyrëse, parashikimin e konsumit të energjisë, planifikimin e prodhimit, tregtimin e energjisë dhe modelimin e tregut. Sipas dokumenteve të tenderit, platforma do të përdorë të dhëna meteorologjike dhe prodhimin e energjisë nga sistemet ekzistuese të instaluara në KESH.
Po ashtu duhet të përdorë të dhëna për çmimet e energjisë të tregut, që duhet të ndërlidhen me sisteme të tjerë të cilët afishojnë çmimet e energjisë në kohë reale, si dhe nga platforma e menaxhimit të aktivitetit të operimeve tregtare të implementuar në KESH. Gjithashtu, platforma duhet të mundësojë shfaqjen e këtyre të dhënave në një ndërfaqe ëeb, ku do të reflektohen çmimet e energjisë në kohë reale sipas një harte.
Më konkretisht ky sistem do të duhet të planifikojë prodhimin për njësi dhe operimin e liqeneve, llogaritjen e çmimit minimal të prodhimit për çdo periudhë, të planifikojë kërkesën e konsumatorëv që do të kenë kontratë furnizimi me KESH, të planifikojë tepricat e HEC-eve të vegjël e me përparësi përtej mbulimit të humbjeve në rrjetin e shpërndarjes, të ndjekë çmimet e bursave të energjisë elektrike në Evropë, si dhe të analizojë situatën gjeopolitike në Evropë.
Sipas dokumenteve të tenderit kjo do të ndihmojë KESH-in të optimizojë menaxhimin e burimeve dhe të rrisë konkurrencën. Ndërkohë që, hapja e kësaj procedure prokurimi vjen në një kohë kur Korporata është kritikuar nga ekspertët për çmimet me të cilët kryen transaksionet e shit-blerjeve të energjisë dhe menaxhimin e Kaskadës.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
