Qeveria e Kinës lufton krizën demografike dhe presionin mbi sistemin e pensioneve, duke e mbajtur popullsinë në punë për më gjatë
Kina do të rrisë moshën e daljes në pension, për herë të parë që nga viti 1978, pasi vendi po përballet me një popullsi në plakje, që do ta lërë atë pa punëtorë.
Vendi gradualisht do të zgjasë moshën e pensionit për të gjithë burrat, nga 60 në 63 vjeç, për gratë në punë zyre nga 55 në 58 dhe për gratë në punë me jakë blu nga 50 në 55, njoftoi agjencia shtetërore e lajmeve Xinhua.
Masat u miratuan nga komiteti i përhershëm i parlamentit të Kinës. Ato do të hyjnë në fuqi në janar dhe do të zbatohet në faza, në mbi 15 vjet, në përputhje me parimin e “rregullimeve me hapa të vegjël”.
Analistët thonë se Kina duhet të veprojë, sepse mosha e ulët e pensionit dhe rënia e nivelit të lindjeve, po rrisin raportin e varësisë së pleqërisë – numrin e pensionistëve ndaj popullsisë në moshë pune.
Popullsia e vendit ra për të dytin vit radhazi në 2023, në 1.4 miliardë, pasi vdekjet tejkaluan lindjet me 2 milionë.
Politikëbërësit e Kinës janë përballur me këtë çështje për vite me rradhë dhe ndryshimi i moshës së daljes në pension ishte paracaktuar në takimin pesëvjeçar të politikës së Partisë Komuniste në korrik.
Lëvizja vjen pasi familjet janë nën presion nga ngadalësimi i rritjes ekonomike, një rënie e zgjatur e sektorit të pronave dhe një treg i dobët i punës, që po rëndon konsumin e brendshëm.
Zhang Jin, drejtor i Institutit Kërkimor të Grupit të Kujdesit të Shëndetit dhe të Moshuarve në Kinë, tha se ekonomia do të përfitonte nga kjo masë.
Midis 2023 dhe 2035, më shumë se 20 milionë njerëz në vend do të arrinin moshën e pensionit çdo vit, tha ai.
Por, ndërrimi ka ngjallur indinjatë tek të rinjtë, të cilët ankohen se tani do të duhet të punojnë më gjatë për të mbështetur të moshuarit.
Shumë nga të rinjtë e Kinës nuk kanë vëllezër e motra, për shkak të “politikës së një fëmije” tashmë të shfuqizuar, e cila kufizoi shkallën e lindjeve në vend për dekada, përpara se të lehtësohej në vitin 2016.
Kina gjithashtu duhet të mbajë popullsinë e saj në punë për më gjatë, për të lehtësuar presionin mbi sistemet e pensioneve të pafinancuara, thanë analistët.
Sipas ndryshimeve, si moshat e daljes në pension ashtu edhe periudhat e kontributeve për pension do të zgjaten gradualisht.
Duke filluar nga janari 2030, periudha minimale e kontributit për të marrë pagesën e pensionit bazë mujor do të rritet në mënyrë të vazhdueshme, nga 15 vjet në 20 vjet, me një rritje prej gjashtë muajsh çdo vit.
Ata, që kanë arritur tashmë periudhën minimale të kontributit, mund të zgjedhin për pension të parakohshëm brenda kufijve të caktuar. Ata, që mbushin moshën e pensionit, mund të aplikojnë gjithashtu për të vazhduar punën deri në tre vjet.
Duke përdorur një përkufizim më të gjerë të moshës së punës, Qendra për Studime Strategjike dhe Ndërkombëtare vlerësoi se raporti i varësisë së pleqërisë së Kinës ishte 21 % vitin e kaluar, kundrejt 27 % për SHBA.
Think-tank përdori një përkufizim më të gjerë se ai i vendosur nga mosha aktuale e daljes në pension, duke krahasuar njerëzit e moshës 65 vjeç e lart, me ata të moshës 15 deri në 64 vjeç.
Kjo shifër pritet të rritet në 52 % deri në vitin 2050 – krahasuar me 39 % për SHBA – dhe do të arrijë në 83 % deri në vitin 2100, kur raporti i SHBA-së do të jetë 55 %. / FT
Postimi ” Kina do të rrisë moshën e daljes në pension për herë të parë që nga viti 1978 ” eshte marre nga Revista Monitor.
