Tërheqja e overdraft-eve nga bizneset dhe ekonomitë familjare deri në fund të muajit dhjetor të vitit 2024 ka arritur vlerën 531.4 milionë euro, që paraqet një rritje të tyre për 58.5 milionë euro (+12.4%) krahasuar me muajin dhjetor të vitit 2023.
Gjatë vitit 2024, qytetarët e Kosovës janë përballur me sfida të jashtëzakonshme ekonomike, të cilat i kanë detyruar të kërkojnë ndihmë nga bankat për të përmbushur nevojat e tyre të përditshme.
Instituti GAP ka prezantuar disa të dhëna lidhur me overdraft-et (mbitërheqjet) nga bankat nga qytetarët dhe bizneset.
GAP ka paraqitur të dhënat për vitin 2019, 2020, 2021, 2022, 2023 dhe 2024.
Të dhënat e publikuara nga Instituti GAP tregojnë se mbitërheqjet bankare nga ekonomitë familjare dhe bizneset në Kosovë kanë arritur një nivel rekord në vitin 2024.
Gjendja e mbitërheqjeve deri në fund të dhjetorit 2024 ka arritur shumën prej 531.4 milionë euro, duke shënuar një rritje prej 58.5 milionë euro (+12.4%) krahasuar me fundin e vitit 2023.
Krahasimi me vitet e kaluara e thellon shqetësimin. Në vitin 2019, mbitërheqjet ishin 318.8 milionë euro, ndërsa rritja graduale vazhdoi vit pas viti: 325 milionë euro në 2020, 341 milionë euro në 2021, dhe 425 milionë euro në 2022. Kjo rritje eksponenciale përfundimisht kulmoi në 2024, ku për herë të parë mbitërheqjet kaluan gjysmën e miliardit euro.
“Gjendja e mbitërheqjeve nga bizneset dhe ekonomitë familjare deri në fund të muajit dhjetor të vitit 2024 ka arritur vlerën 531.4 milionë euro, që paraqet një rritje (të stokut) të tyre për 58.5 milionë euro (+12.4%) krahasuar me muajin dhjetor të vitit 2023”.
Kjo situatë tregon një presion të madh financiar mbi qytetarët dhe bizneset, të cilët po detyrohen të përdorin mbitërheqjet për të përballuar nevojat e tyre të përditshme apo për të mbajtur në këmbë aktivitetet ekonomike. Rritja e shpenzimeve të jetesës, inflacioni, dhe mungesa e përkrahjes së mjaftueshme institucionale janë disa nga arsyet kryesore që i kanë shtyrë qytetarët drejt këtyre huave afatshkurtra, shpeshherë me norma të larta interesi.
Po ashtu edhe numri i kredimarrësve gjatë vitit 2024 ka arritur mbi 36 mijë, të cilat u janë drejtuar bankave komerciale të Kosovës për të marrë kredi. Shifër kjo mbi një mijë më e lartë sesa në periudhën e njëjtë të vitit paraprak. Derisa shuma e përgjithshme e kredive bruto në sektorin bankar deri në muajin dhjetor të vitit që lamë pas ka arritur 5 miliardë e 810 milionë euro, me rritje mbi 131 milionë euro ose 2.32 për qind krahasuar me muajin paraprak
Prej shumës së përgjithshme të kredive bruto, për ekonomitë familjare janë rreth 2. 3 miliardë euro, dhe për ndërmarrjet rreth 3. 5 miliardë euro. Ndërsa, sipas raportit të fundit të Bankës Qendrore të Kosovës vlera e kredive të reja në dhjetor arriti 264.1 milionë euro.
Kurse, Agjencia e Statistikave të Kosovës ka publikuar Indeksin e Harmonizuar të Çmimeve të Konsumit (IHÇK), sipas të cilit çmimet e konsumit në vitin 2024 u rritën me një mesatare prej 1.6%.
Sipas ASK-së çmimet pësuan një rritje vjetore prej 1,1% në dhjetorin e vitit 2024 krahasuar me dhjetorin e vitit 2023 dhe rritje 0,7% në dhjetor 2024 krahasuar me nëntor 2024.
“Indeksi i tërësishëm i harmonizuar i çmimeve të konsumit është më i lartë në një mesatare prej 1,1% në muajin dhjetor 2024, krahasuar me muajin dhjetor 2023. Inflacioni mujor ishte 0,7% në muajin dhjetor 2024. Ndërsa norma mesatare vjetore e inflacionit për vitin 2024 është 1,6%”.
Postimi ” Kriza financiare në Kosovë, gjatë 2024 qytetarët morën overdraft 531 milionë euro nga bankat ” eshte marre nga Revista Monitor.
