Përpara mbajtjes së zgjedhjeve vendore të 2023-shit, qeveria synon të “shkundë” sërish bashkitë që të jenë më efiçente në mbledhjen e të ardhurave dhe ofrimin e shërbimeve publike. Për këtë qëllim është hedhur për konsultim e Strategjia Ndërsektoriale për Decentralizimin dhe Qeverisjen Vendore, 2023-2030, e hartuar nga Ministria e Brendshme, e cila është dokumenti i dytë që vendos korniza zhvillimi për vetëqeverisjen vendore, pas strategjisë 2015-2020 dhe reformës administritarivo-territoriale.
Në relacionin shoqërues të strategjisë, theksohet se 61 bashkitë në vend kanë pasur një perfomancë jo shumë të kënaqshme sa i takon direktivave të vendosura nga qeveria përgjatë viteve 2015-2020, ku progresi strategjik i parë në këndvështrimin administrativ, funksional dhe fiskal është vlerësuar në masën 67%.
Për këtë qëllim, vlerësohet se ka ende nevojë për të intensifikuar bashkëpunimin ndërmjet qeverisë vendore dhe asaj qendrore, për të përputhur bazën ligjore me funksionet, implementimin e funksioneve të reja dhe vazhdimin e punës për rritje të kapaciteteve të bashkive, shoqëruar me menaxhim më efiçent të financave vendore dhe mirëqeverisje, me qëllim nxitjen e zhvillimit ekonomik vendor të qëndrueshëm.
Strategjia do të ketë një kohëzgjatje shtatëvjeçare, brenda së cilës synohet konsolidimin e procesit të decentralizimit, krijimi i një mjedisi nxitës për zhvillimin ekonomik vendor të qëndrueshëm, forcimi i të ardhurave vendore të bashkive, dixjitalizimi i shërbimeve dhe ofrimi i tyre online, sigurimin e i një qeverisjeje të hapur, rritje e transparencës, llogaridhënies; shtrirje më të madhe të e-qeverisjes në nivel vendor dhe avancimin e agjendës së BE-së në nivel vendor.
Në këtë kuadër, strategjia synon zgjerimin, thellimin dhe shtimin e masave të parashikuara dhe të pazbatuara plotësisht, apo edhe të zbatuara por që kërkojnë mbështetje për qendrueshmëri afatgjatë.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
