Tenderët publikë për punë, mallra apo shërbime fitohen nga kompanitë me vlera afër fondit limit, ndërkohë që ky fakt konfirmohet edhe nga të dhënat zyrtare të Agjencisë së Prokurimit Publik. Sipas raportit vjetor të këtij institucioni, fondi i prokuruar për vitin 2022 është rreth 134.3 miliard lekë, ndërkohë që fondi i kursyer është vetëm 8.4% e tij.
Në krahasim me një vit më parë vihet re një rritje e kursimit, duke qenë se për vitin 2021 ky tregues ishte 5.5%. Megjithatë, shpallja e ofertave fituese, afër fondit limit të vënë në dispozicion është cilësuar nga ekspertët, si shenjë e manipulimit të garës dhe paracaktimit të fituesve, duke çuar edhe në shpërdorimin e parave të buxhetit të shtetit. Ndërkohë që, nuk kanë munguar rastet kur tenderët janë fituar edhe me vlera, sa 99% e fondit limit.
Ndërkaq, procedurat pa shpallje paraprake të njoftimit, apo siç njihen ndryshe tenderët në tavolinë, zënë 3.3% të numrit total të procedurave të përfunduara me fitues gjatë vitit 2022. Në raport me një vit më parë vihet re një rritje e numrit të këtyre procedurave, por gjithsesi fondi i prokuruar përmes kësaj procedure është më i ulët. Në total, përmes kësaj forme janë zhvilluar 157 tenderë, teksa vlera e kontratave arirn në 1.26 mld lekë.
Në total për vitin që kaloi numri i procedurave tenderuese te vazhduara arriti në 4 674 tenderë, ndërsa u përfunduan me fitues 4 507 prej tyre.
Ola Mitre/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
