Në Kosovë, prilli nuk do të sjellë ndryshim në faturat e energjisë, por vetëm një pauzë të shkurtër para rritjes së paralajmëruar. Zyra e Rregullatorit për Energji ka vendosur ta shtyjë për një muaj vendimin për tarifat e reja të rrymës, duke e zhvendosur çdo ndryshim të mundshëm për më 1 maj.
Zyra e Rregullatorit për Energji Zyra e Rregullatorit për Energji ka vendosur të shtyjë hyrjen në fuqi të tarifave të reja të energjisë elektrike, të cilat fillimisht ishin paraparë të aplikoheshin nga 1 prilli 2026.
Sipas vendimit të ri, tarifat e reja pritet të hyjnë në fuqi më 1 maj 2026, ndërsa gjatë muajit prill do të vazhdojnë të mbeten në fuqi tarifat aktuale.
Kryesuesi i bordit të ZRRE-së, Ymer Fejzullahu, ka konfirmuar se nuk do të ketë ndryshime gjatë muajit të ardhshëm.
“Tarifat aktuale të energjisë elektrike do të mbesin në fuqi gjatë muajit prill, ndërsa tarifat e reja pritet të hyjnë në fuqi më 1 maj”, ka deklaruar Fejzullahu.
ZRRE-ja është institucioni përgjegjës për shqyrtimin dhe përcaktimin vjetor të tarifave të energjisë elektrike në Kosovë, të cilat zakonisht shpallen më 1 prill dhe vlejnë deri më 31 mars të vitit pasues. Megjithatë, këtë vit vendimmarrja është shtyrë për një muaj, duke hapur diskutime të shumta në opinion publik dhe politik.
Në këtë proces, vëmendje të madhe ka marrë edhe kërkesa për rritje të ndjeshme të çmimit të energjisë, e cila sipas operatorëve energjetikë mund të shkojë deri në 21 për qind.
Deputetja e Lidhjes Demokratike të Kosovës Hykmete Bajrami ka reaguar duke e cilësuar shtyrjen si të dyshimtë dhe të ndërlidhur me zhvillimet politike në vend.
Sipas saj, shtyrja njëmujore mund të ketë lidhje me kalkulimet institucionale rreth mundësisë së zgjedhjeve.
“Ky një muajsh lë të kuptohet se ZRRE-ja po bën kalkulime nëse do të ketë zgjedhje të reja apo jo, të cilat mund të ndikojnë në mënyrën e vendimmarrjes për rritjen e çmimit”.
Ajo ka shtuar se kostoja e energjisë së importuar do të reflektohet në mënyrë të pashmangshme tek qytetarët, pavarësisht formës së vendimmarrjes.
“Kur kapet ZRRE-ja, çmimi i rrymës varet nga koha e zgjedhjeve”, ka thënë ajo, duke kritikuar mënyrën e menaxhimit të procesit.
Sipas të dhënave të paraqitura në aplikimet zyrtare, Kosova ka importuar rreth 259 milionë euro energji elektrike gjatë vitit 2025, një shifër që sipas ekspertëve të sektorit energjetik ka ndikuar drejtpërdrejt në kërkesat për rritje të tarifave.
Në këtë proces janë përfshirë edhe operatorët kryesorë të sistemit energjetik në vend, përfshirë KESCO, KEDS dhe KOSTT, të cilët kanë dorëzuar kërkesa për rritje të të hyrave të lejuara për vitin 2026.
KESCO ka kërkuar rritje mbi 20 për qind të tarifave të energjisë elektrike, duke argumentuar se rritja e importit dhe kufizimet në prodhimin vendor kanë ndikuar në rritjen e kostove. Në aplikimin e saj, kompania ka kërkuar që të hyrat e lejuara maksimale të arrijnë në 528.78 milionë euro për vitin e ardhshëm.
Nga ana tjetër, KEDS ka kërkuar rreth 235 milionë euro të hyra të lejuara, ndërsa KOSTT mbi 99 milionë euro, duke argumentuar nevojën për investime dhe përmirësim të shërbimeve në sistemin e transmetimit dhe furnizimit.
KOSTT ka theksuar se synon rritjen e cilësisë së shërbimeve për konsumatorët, ndërsa KEDS dhe KESCO janë thirrur në rritjen e kostove operative dhe nevojën për stabilitet financiar të sistemit energjetik.
Një ndër faktorët që është përmendur në dokumentet e dorëzuara në ZRRE është edhe vazhdimi i punimeve rehabilituese në njësitë gjeneruese të Korporatës Energjetike të Kosovës KEK. Sipas planifikimeve, njësia B1 në termocentralin Kosova B pritet të jetë jashtë funksionit për rreth tetë muaj, një periudhë më e gjatë krahasuar me vitin paraprak.
Kjo situatë pritet të rrisë varësinë e Kosovës nga importi i energjisë elektrike, gjë që sipas operatorëve ndikon drejtpërdrejt në rritjen e çmimit final për konsumatorët.
Si arsye tjetër për rritjen e tarifave është përmendur edhe vendimi për rritjen e pagës minimale në Kosovë, i cili sipas kompanive energjetike ka ndikuar në rritjen e kostove operative.
ZRRE-ja ka bërë të ditur se të gjitha kërkesat do t’i nënshtrohen një shqyrtimi të detajuar dhe se do të aprovohen vetëm kostot që vlerësohen si të arsyeshme.
Në vitin e kaluar, tarifat e energjisë elektrike në Kosovë ishin rritur për 16.1 për qind, ndërsa aktualisht sistemi tarifor mbetet i ndarë në dy blloqe: deri në 800 kilovat në orë në muaj dhe mbi këtë prag, me çmime të ndryshme për secilën kategori.
Sipas tarifave aktuale, konsumatorët që shpenzojnë deri në 800 kilovat në orë në muaj paguajnë 9.05 centë për kilovat, ndërsa ata që shpenzojnë mbi këtë prag paguajnë 15.43 centë për kilovat.
Kurse tarifat e lira që shfrytëzohen gjatë natës nga ora 23:00 deri në 08:00 të mëngjesit, konsumatorët për një kilovat paguajnë 3.88 centë për ata që shpenzojnë deri në 800 kilovatë. Ndërkaq, ata që shpenzojnë më shumë se 800 kilovatë paguajnë 7.28 centë për kilovat.
Postimi ” Shtyhet vendimi për tarifat e reja të energjisë, pritet rritje deri në 21% nga 1 maji ” eshte marre nga Revista Monitor.
