21.5 C
Tirana
E hënë, 13 Tetor 2025

Tirana Bank dhe BERZH firmosin bashkëpunim strategjik prej 10 milionë euro për investimet e gjelbra

Duhen Lexuar

Tirana Bank dhe BERZH angazhohen në një bashkëpunim strategjik me një paketë prej 10 milionë euro për të fuqizuar investimet e gjelbra të Ndërrmarrjeve të Vogla dhe të Mesme dhe për të zgjeruar financimin e tregtisë në Shqipëri

Tirana Bank ka ndërmarrë një hap tjetër të rëndësishëm në forcimin e rolit të saj si katalizator i rritjes së qëndrueshme dhe inovacionit në Shqipëri. Banka ka nënshkruar një marrëveshje me Bankën Evropiane për Rindërtim dhe Zhvillim (BERZH), duke siguruar një paketë financiare deri në 10 milionë euro për të mbështetur dy prioritete kyçe: fuqizimin e bizneseve të vogla dhe të mesme (NVM) dhe zhvillimin e mëtejshëm të financimit të tregtisë.

Ky bashkëpunim shënon partneritetin e parë mes Tirana Bank dhe BERZH, duke nënvizuar rëndësinë e investimeve të qëndrueshme dhe inovacionit financiar ndërsa Shqipëria vazhdon rrugën e transformimit ekonomik dhe integrimit në tregjet evropiane dhe rajonale.

Në kuadër të marrëveshjes, 5 milionë euro janë dedikuar përmes Programit SME Reboot të BERZH-it për të ndihmuar bizneset shqiptare të investojnë në teknologji efikase dhe miqësore me mjedisin. Këto investime do t’i mundësojnë kompanive të modernizojnë aktivitetin, të ulin kostot dhe të rrisin konkurrueshmërinë, duke i përafruar praktikat e tyre me standardet e Bashkimit Evropian dhe tregjeve ndërkombëtare. Për më tepër, bizneset do të përfitojnë nga një grant deri në 10% të shumës së investimit, i mbështetur nga donatorë ndërkombëtarë si Danimarka, Luksemburgu, Norvegjia, Zvicra dhe Shtetet e Bashkuara.

Duke ndihmuar bizneset të adoptojnë teknologji të gjelbra, kjo nismë kontribuon drejtpërdrejt në ndërtimin e një ekonomie më të qëndrueshme, reduktimin e ndikimit mjedisor dhe rritjen e mundësive për konkurrencë në një treg gjithnjë e më kërkues.

Marrëveshja përfshin gjithashtu një linjë financimi prej 5 milionë euro përmes Programit të Lehtësimit të Tregtisë së BERZH-it. Kjo do t’i mundësojë Tirana Bank të ofrojë garanci dhe parapagime për të mbështetur eksportin, importin dhe shpërndarjen lokale të mallrave. Përveç injektimit të drejtpërdrejtë të likuiditetit në flukset tregtare, kjo linjë do të ndihmojë në zgjerimin e marrëdhënieve me bankat korrespondente dhe në forcimin e ekspertizës së bankës në fushën e financimit të tregtisë.

Ky zhvillim është veçanërisht i rëndësishëm për ekonominë shqiptare, ku tregtia rajonale dhe ndërkombëtare mbetet një nga motorët kryesorë të rritjes dhe konkurrueshmërisë. Duke çliruar potencialin e tregtisë, partneriteti do të mbështesë bizneset shqiptare në ndërtimin e lidhjeve më të forta me furnitorët dhe klientët përtej kufijve.

Znj. Charlotte Ruhe, Drejtuese Rajonale e BERZH-it për Evropën Qendrore dhe Juglindore, theksoi rëndësinë e kësaj nisme:

“Jemi të lumtur të nisim partneritetin me Tirana Bank për të zgjeruar qasjen në financime të gjelbra dhe mbështetje tregtare në Shqipëri. Ky bashkëpunim është i rëndësishëm për të nxitur rritjen e qëndrueshme, për të forcuar konkurrueshmërinë rajonale dhe për të ndihmuar bizneset lokale të përafrohen me standardet ndërkombëtare. Duke kombinuar mjetet financiare me asistencën teknike, po hapim mundësi të reja për inovacion dhe reziliencë në sektorin privat shqiptar.”

Nga ana e Tirana Bank, Drejtori i Përgjithshëm Ekzekutiv, Z. Dritan Mustafa u shpreh:

“Jemi krenarë që po bashkëpunojmë me BERZH-in për dy iniciativa me ndikim të madh, të cilat dëshmojnë vizionin tonë afatgjatë për fuqizimin e bizneseve shqiptare. Kredia SME Reboot ndihmon bizneset e vogla të investojnë në teknologji të gjelbra, ndërsa linja e financimit të tregtisë forcon aftësinë tonë për të mbështetur tregtinë ndërkufitare. Këto programe pasqyrojnë angazhimin tonë për të nxitur një zhvillim gjithëpërfshirës dhe të qëndrueshëm, duke e pozicionuar Tirana Bank si një katalizator për inovacionin dhe konkurrueshmërinë në tregun shqiptar.”.

E themeluar në vitin 1996 si banka e parë private në Shqipëri, Tirana Bank ka zgjeruar vazhdimisht rolin e saj si një bankë universale që ofron një gamë të gjerë shërbimesh për individë dhe biznese. Si pjesë e Grupit Balfin, një nga grupet ekonomike private më të mëdha dhe më dinamike në Ballkanin Perëndimor, Tirana Bank është e pozicionuar strategjikisht për të kombinuar inovacionin, orientimin drejt klientit dhe ekspertizën financiare për të nxitur rritjen.

Partneriteti me BERZH përfaqëson një hap të natyrshëm përpara, duke forcuar ambicien e Tirana Bank për të qenë një mbështetëse kryesore e investimeve të qëndrueshme dhe një partner financiar i besuar për bizneset e çdo madhësie. Duke adresuar drejtpërdrejt nevojat e NVM-ve dhe duke nxitur zhvillimin e tregtisë, kjo nismë do të ketë një ndikim afatgjatë në krijimin e vendeve të punës dhe rritjen e konkurrueshmërisë.

 

Postimi ” Tirana Bank dhe BERZH firmosin bashkëpunim strategjik prej 10 milionë euro për investimet e gjelbra ” eshte marre nga Revista Monitor.

- Reklama -
spot_img
- Reklama -

Artikujt e Fundit

WallStreet.al Deshirojme tju informojme per cdo artikull te ri qe publikojme ne web.
Dismiss
Allow Notifications