Buxheti i Ministrisë së Infrastrukturës dhe Energjisë parashikohet në 52.87 mld lekë për vitin 2024, ku investimet do të jenë në vlerën e 47.2 mld lekë. Ministrja e Infrastrukutrës dhe Energjisë, Belinda Balluku prezantoi në Komisionin parlamentar të Veprimtarive Prodhuese projektet që do të financohen vitin që vjen, duke bërë me dije se për transportin rrugor Unaza e Madhe e Tiranës, aksi Elbasan – Qafë Thanë, tuneli i Llogarasë apo zgjerimi i autostradës Tiranë – Durrës janë disa nga prioritetet për vitin që vjen.
Paralelisht do të financohen edhe kontratat koncesionare për aksin Orikum – Dukat, rrugën e Arbrit dhe rrugën e Kombit. Sa i takon hekurudhave, Balluku bëri me dije se janë buxhetuar investime në linjën Vorë – Hani i Hotit dhe Tiranë – Durrës, ndërsa janë në shqyrtim 5 ofertat për hartimin e studimit të fizibilitetit për linjën e re Durrës – Prishtinë.
Qeveria i është rikthyer edhe projektit për ndërtimin e aeroportit të Sarandës, teksa sipas ministers shumë shpejt pritet të hapet gara e partneritetit publik – privat për këtë vepër aeroportuale. Ndërkaq, sa i takon sektorit të energjisë, Balluku përmendi veçanërisht investimet në matës inteligjencë, ndërkohë që pritet nënshkrimi i marrëveshjes mes operatorëve të trnamsetimit shqiptar dhe Italian për linjën nënujore të transmetimit të energjisë mes 2 vendeve.
Balluku u ndal edhe te investimet më ujësjellës, ku priortiet për vitin që vjen iu jepet zonave bregdetare.
Paralelisht, u njoftua hapja e garës për ndërtimin e rrjetit të gazit Fier – Vlorë, që do të mundësojë lidhjen e gazsjellësit TAP me TEC Vlorë, me një gjatësi prej 33 km. Ndërkaq, sipas Ballukut mbështetja buxhetore për programin e burimeve natyrore mbetet e ulët edhe për vitin 2024, duke theksuar se kërkesa për një mbështetje më të lartë do të jetë për vitin 2025.
Deputetët mbështetën parashikimet buxhetore për 11 programet që mbulon kjo ministri, por kërkuan një rritje të zhvillimit të infrastrukurës rurale, si dhe ndërtimin e bypassit të Beratit për të cilin Balluku premtoi nisjen e studimit.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
