Tremujori i dytë i vitit duket se ka patur një bilanc pozitiv për energjinë. Të dhënat më të fundit nga INSTAT tregojnë se përdorimi i energjisë elektrike nga konsumatorët, u ul me 3,5 % krahasuar me të njëjtën periudhë të një viti më parë. Por, dy kategoritë, që janë biznesi dhe familjaret kanë sjellje të ndryshme. Sipërmarrjet kanë përdorur më pak energji elektrike, 7,3%. Por, e njëjta gjë nuk mund të thuhet për familjarët, konsumi i të cilëve për këtë periudhë u rrit me 1,2%.
Një lajm i mirë është edhe zvogëlimi i humbjeve në rrjet që arritën vlerën 359 GWh, duke shënuar kështu një rënie me 1%. Humbjet në transmetim jane rritur me 2,8%, ndërsa ato në shpërndarje ranë me 1,7%. Humbjet teknike në shpërndarje kanë shënuar një rritje me 0,2%, ndërsa ato jo teknike në shpërndarje rënie me 5,7% krahasuar me tremujorin e dytë të vitit 2022.
Prodhimi neto vendas i energjisë elektrike në këtë periudhë u rrit me 37,8% duke arritur vlerën 2.269 GWh. Ky prodhim u realizua nga hidrocentralet publike në masën 52,3%, nga hidrocentralet private dhe koncensionare në masën 46,5 % dhe nga të tjerë prodhues (Fotovoltaik) në masën 1,2 % të prodhimit neto.
Nga ana tjetër rënie me 46,5% ka pësuar importi bruto i energjisë elektrike, që arriti vlerën 355 GWh. Duket se tremujori i dytë i vitit ka qenë i “artë” për Korporatën Elektroenergjetike Shqiptare, ku si pasojë e reshjeve të shumta ka rritur me 89,4% eksportin në vlerën prej 786 GWh.
Ndërkohë, shkëmbimi i energjisë elektrike, që është diferenca mes eksportit dhe importit bruto të energjisë ka arritur vlerën pozitive prej 431 GWh, krahasuar me tremujorin e dytë të vitit 2022.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
