Gjysma e parë vitit ka regjistruar rritje të kredisë për likuiditete nga bizneset. Veçanërisht gjatë tremujorit të dytë, bizneset shqiptare kanë rritur kërkesën për kredinë afatshkurtër, duke pakësuar atë për investime.
Sipas të dhënave zyrtare të Bankës së Shqipërisë, kredia për biznese është rritur mesatarisht me 5% në tremujorin e dytë, duke shfaqur ngadalësim të mëtejshëm me 0.4 pikë përqindje më pak se një tremujor më parë. Zhvillimet brenda segmenteve kryesore tregojnë që norma më të larta të rritjes së kredisë për likuiditete, të cilat kanë kompensuar disi ngadalësimin e mëtejshëm të kredisë për investime.
Kështu, kredia për likuiditete u rrit mesatarisht me 6.8% krahasuar me 6.1% në tremujorin e parë. Ndërkohë, kredia për investime u rrit me 3.8% ose 1 pikë përqindje më pak se në tremujorin e parë. Zgjerimi i kredisë është vërejtur më së shumti tek bizneset që ushtrojnë aktivitetin e tyre në sektorin e tregtisë dhe akomodimit, në sektorin e shërbimeve dhe në atë të ndërtimit. Totali i huave për korporatat financiare ra në 404.3 miliardë lekë në fund të gjashtëmujorit, nga 407 miliardë në janar të këtij viti.
Më pak e shtrënguar është situata e individëve kur vjen fjala për kreditimin, megjithëse edhe kredia për ta ka vijuar të ngadalësohet për këtë gjashtëmujor. Ky ngadalësim ka reflektuar ritmet më të ulëta të rritjes së kredisë për banesa me 2 pikë përqindje, në 15.2%.
Ndërsa ajo për konsum shfaqi një përmirësim të lehtë – veçanërisht në muajt maj – qershor, duke shënuar një rritje prej 9%. Sipas monedhave brenda këtij portofoli vihet re përmirësimi i kredisë në lekë, ndërsa ajo në valutë u ngadalësua.
Kjo ecuri në kahe të kundërta reflekton rikthimin e vëmendjes drejt kreditimit në monedhën vendase e ndikuar nga lëvizjet e kundërta të normave të interesit në produktet e financimit për këtë segment.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
