Pas dritës jeshile nga ana e qeverisë italiane për dekretin e katërt në mbështetje të familjeve dhe sipërmarrjeve të prekura nga rritja e cmimit të energjisë, vëmendja është zhvendosur tek buxheti 2023. Një gjë që dëshmohet dhe nga takimet që ekzekutivi ka pasur me sindikatat.
Mes masave që mund të jenë pjesë e paketës së ligjit të ardhshëm të Buxhetit, disa mund të kenë të bëjnë me pensionet. Qeveria italiane është duke punuar në dy plane paralale: mbështetje për daljen e parakohshme në pension, për shembull në moshën 62 ose 63 vjeçare me një numër minimal vitesh kontributi; por dhe stimuj për ata që vendosin të zgjasin qëndrimin në punë me një rritje page prej 10%. Këta të fundit në momentin që arrijnë moshën e daljes në pension nuk do të paguajnë më kontribute dhe as punëdhënësit e tyre. Sipas ekzekutivit, kjo është dhe një mënyrë për të mos hequr dorë nga specialistët e kualifikuar. Një masë e tillë do të kushtonte 4 – 4.5 miliardë euro në vit. Sindikatat kanë konfirmuar mbështetjen e tyre për këtë plan.
Por cështja e pensioneve përfaqëson dhe një pikë shumë të brishtë për sa i përket financave publike, pasi cdo ndërhyrje do të kushtojë shunë shtrenjtë. Vetëm ndihma për përballimin e inflacionit deri në vitin 2025, e cila sapo është miratuar, kërkon 50 miliardë euro dhe hapësira për të manovruar është shumë e ngushtë duke pasur parasysh dhe emergjencat e tjera: kryesisht çmimin e lartë të energjisë.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
