Yield-i i obligacioneve 10-vjeçare ra përsëri në ankandin e parë të vitit 2025 dhe arriti nivelin më të ulët në tre vitet e fundit.
Sipas informacionit nga Banka e Shqipërisë, në ankandin e ditës së martë, yield-i uniform i pranuar i obligacioneve 10-vjeçare zbriti në 5.25%, nga 5.93% që kishte qenë në ankandin e mëparshëm, të zhvilluar në tetor 2024.
Nga 4 miliardë lekë që ishte shuma e shpallur për financim nga Ministria e Financave, vlera totale e kërkesave arriti në pothuajse 7.55 miliardë lekë. Për shkak të kërkesës së lartë dhe çmimit të favorshëm të ofruar, Ministria e Financave vendosi ta rrisë shumën e emetimit në vlerën e 4.6 miliardë lekëve.
Yield-i i këtyre instrumenteve ka arritur nivelin më të ulët që prej janarit 2022.
Edhe fillimi i këtij viti ka konfirmuar një tendencë në rënie të mëtejshme të yield-eve të instrumenteve afatgjata, ndërsa bonot e thesarit kanë shënuar një korrektim shumë të lehtë në rritje, pasi në fund të vitit të kaluar patën zbritur poshtë nivelit të normës bazë të interesit.
Banka e Shqipërisë uli dy herë normën bazë të interesit vitin e kaluar, nga 3.25%, në 2.75%. Këto lëvizje janë përcjellë shpejt në tregun e instrumenteve të borxhit të qeverisë.
Rënia e yield-eve është mbështetur edhe nga një gjendje likuide e tregut të brendshëm financiar, kërkesa e lartë e investitorëve për këto tituj dhe një perceptim i ulët rreziku prej tyre. Përveç kërkesës nga investitorët e brendshëm, gjatë këtij viti është vërejtur për herë të parë kërkesë për titujt e qeverisë në lekë edhe nga investitorë institucionalë jorezidentë.
Rënia e yield-eve është një zhvillim pozitiv për qeverinë shqiptare, por më gjerë edhe për huamarrësit privatë në ekonominë shqiptare. Titujt e borxhit të qeverisë shqiptare në përgjithësi janë instrumente referues edhe në ecurinë e normave të interesit të kredisë për sektorin privat të ekonomisë.
Normat e ulëta të interesit kanë favorizuar një rritje të shpejtë të kreditimit në lekë në dy vitet e fundit. Në fund të muajit nëntor, portofoli i kredisë për ekonominë arriti vlerën e 824 miliardë lekëve, me një rritje prej 14.1% krahasuar të njëjtën periudhë të një viti më parë.
Ndërkohë, ulja e yield-eve është një zhvillim i pafavorshëm për investitorët në tregun e brendshëm financiar. Në veçanti, kjo prek investitorë institucionalë afatgjatë, si fondet e pensionit, që i investojnë fonde pothuajse tërësisht në obligacione të qeverisë shqiptare. Rënia e yield-eve të tyre sjell rrjedhimisht edhe ulje të kthimeve nga fondet private të pensionit.
Bankat ngelen investitori kryesor në titujt e borxhit të qeverisë shqiptare. Ulja e yield-eve të bonove dhe obligacioneve gradualisht pritet të ushtroje presione rënëse edhe mbi normat e interesit të depozitave./ E.Shehu

Burimi: BSH
Postimi ” Obligacionet 10-vjeçare, yield-i zbret në nivelin më të ulët të tre viteve të fundit ” eshte marre nga Revista Monitor.