Elisabeta Dosku/
Ndërsa tashmë ekziston një vendim i zbardhur i Gjykatës Kushtetuese, i cili ka rrëzuar tatimin e vendosur nga qeveria prej 15-23 për qind për profesionistët e lirë, rezulton se shumë biznese të cilët kanë paguar detyrimet nga frika e gjobave, nuk kanë ende një zgjidhje se si do të rimbursohen.
Deputetja demokrate, Jorida Tabaku, ka bërë me dije se aktualisht janë rreth 10 mijë biznese që kanë paguar një taksë që nuk duhej ta paguanin. Nga të cilët, buxheti i shtetit ka grumbulluar mbi 10 mln euro të ardhura nga 10 mijë profesionistë të lirë.
Sipas saj “këto të ardhura janë mbledhur nga një taksë e pandershme dhe antikushtetuese.”
Për këtë arsye, deputetja Tabaku i bën apel qeverisë që të nisë menjëherë procedurat për t’ia rikthyer këto 10 mln euro shtresës së mesme së cilës i është marrë në kundërshtim me Kushtetutën.
“Vendimi i Gjykatës Kushtetuese është final, i padiskutueshëm. Qeveria shqiptare ka vetëm detyrën që të zbatojë këtë vendim! Nuk mundet në një shtet të së drejtës, në një demokraci perëndimore të vihen më diskutim vendimet e asnjë gjykate për më tepër asaj kushtetuese”, shprehet Tabaku.
Sipas saj, 10 mln euro nuk janë kurrgjë për arkën e shtetit por janë shumëçka për xhepin e shtresës së mesme që është shtylla kurrizore e vendit tonë. “Atyre u duhet kthyer ajo që është marrë padrejtësisht dhe pandershmërisht”, thekson Tabaku.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
