Lidion Kulla/
Huamarrja e re neto në tregun e brendshëm u shtua me 24.7 miliardë lekë në tremujorin e dytë, e cila konsistoi thuajse tërësisht, apo 97%, në obligacione me maturim nga 2-15 vjet. Në tremujorin e dytë u maturua edhe obligacioni i fundit 2-vjeçar në Euro prej 70 milionë eurosh.
Gjatë kësaj periudhe, pjesa më e madhe e instrumenteve të borxhit u ble nga bankat, duke financuar rreth 68% të shtesës së huamarrjes së qeverisë. Individët, nga ana tjetër, shtuan pjesëmarrjen në ankandet e emetimit të titujve të qeverisë, duke mbuluar rreth 8% të huamarrjes neto në tregun e brendshëm. Një fenomen i ri i këtij viti ishte blerja e titujve të qeverisë edhe nga investitorët jorezidentë.
Portofoli i tyre në fund të 6-mujorit shënoi rreth 6 miliardë lekë, ose 0.8% të totalit të borxhit të brendshëm. Megjithatë, pjesëmarrja e tyre gjatë tremujorit të dytë mbuloi rreth 18% të shtesës së borxhit të qeverisë. Huamarrja neto në tregun e huaj, gjatë tremujorit të dytë u reduktua me 8.8 miliardë lekë.
Për gjysmën e parë të vitit, ndërkohë, huamarrja neto në tregun e huaj rezultoi në rënie me 10.6 miliardë lekë. Tepricat e likuiditetit në valutë të trashëguara nga një vit më parë, si pasojë e emetimit të eurobondit, janë përdorur në shërbimin e borxhit të huaj përgjatë vitit 2024.
Zhvillimet në huamarrjen e qeverisë së bashku me vlerat e suficitit fiskal të kësaj periudhe u faktorizuan në teprica të larta likuiditeti, të disponueshme për t’u shpenzuar në muajt pasardhës. Borxhi publik u vlerësua në rreth 56.8% të PBB-së në fund të gjysmës së parë të vitit 2024, duke u reduktuar me rreth 2.1 pikë përqindje nga niveli i shënuar në fund të vitit 2023.
Por, rënia e mëtejshme e këtij raporti lidhet më së shumti me mbiçmimin e lekut në raport me euron, monedhë në të cilën është marrë shumica e borxhit të jashtëm, me rritjen ekonomike dhe një pozicionim më të mirë fiscal të vendit tonë, gjatë gjysmës së parë të vitit.
Raporti i borxhit të brendshëm ndaj totalit të borxhit arriti në 56.3% në fund të tremujorit të dytë, nga 54.4% që ishte në fund të vitit 2023. Rritja e nivelit të borxhit të brendshëm erdhi si pasojë e shtimit të huamarrjes në tregun vendase, ndërkohë që shlyerjet e borxhit të huaj kanë qenë të një intensiteti më të lartë, sesa disbursimet e huave të huaja përgjatë kësaj periudhe.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
