Auditimi i ndërmarrë nga Drejtoria e Kontrollit të Brendshëm Financiar Publik pranë Ministrisë e Financave në institucionet publike, ka konstatuar shkelje të disiplinës financiare të cilat kanë shkaktuar efekt financiar negativ në buxhetin e shtetit në një vlerë prej 473.2 milionë lekë nga të cilat rreth 38.5% në sisteme të tjera specifike të njësive publike dhe rreth 23.1% e efektit është konstatuar në tatime, taksa.
Referuar raportit vjetor për Funksionimin e Kontrollit të Brendshëm Financiar Publik, vlera e shkeljeve financiare e konstatuar gjatë vitit 2023 është rritur në krahasim me vitin e mëparshëm, tregues ky që tërheq vëmendjen se perfomanca e subjekteve ku është identifikuar shkelja është e dobët dhe se sistemet e menaxhimit financiar dhe kontrollit paraqesin risk të lartë të dështimit për përdorimin me efektivitet, ekonomi dhe efiçencë të fondeve publike.
Konkretisht vlera më e lartë e shkeljeve është në tatime, taksa dhe dogana me një vlerë dëmi ekonomik prej 109 milionë lekësh, pasuar nga administrim prone dhe pasuri me 54 milionë lekë, ndjekur nga prokurim, blerje dhe investime me 52 milionë lekë dëm të shkaktuar në buxhet. Një peshë të konsiderueshme zë edhe zëri paga, trajtime, shpërblime dhe komisione me afro 37 milionë lekë dëm.
Për vlerën e efektit negativ të shkaktuar është kërkuar rikuperimi i shumës dhe ndjekja e arkëtimit deri në zhdëmtimin e plotë. Krahas, janë dhënë rekomandime për forcimin e kontrolleve dhe procedurave me qëllim parandalimin e përsëritjes të këtyre rasteve në të ardhmen.
Gjetjet kryesore në sistemin e prokurimeve evidentohen në mos argumentim dhe mbështetje me kërkesat dhe nevojat e njësisë në planifikimin për mallra/shërbime, si dhe përllogaritjen e fondit limit; Shkelje të procedurave të prokurimit publik përfshirë specifikimet teknike, procedurat e tenderimit, si dhe zbatimi i kontratave; Mos ndjekjen e të gjithë hapave ligjorë për blerjet me vlera të vogla, si dhe favorizimi në disa raste të blerjeve të të njëjtit operator ekonomik; Përllogaritje e pa argumentuar e fondi limit, si bazë për fillimin e procedurave të prokurimit; Nënshkrim të kontratës duke ndryshuar kriteret e përcaktuara në dokumentet e tenderit me të cilat është shpallur fitues subjekti. Gjetjet kryesore në sistemin e kontabilitetit dhe raportimit financiar evidentohen në: Mos menaxhimi i mirë nga njësitë publike i procesit të nxjerrjes jashtë përdorimit të aktiveve dhe kryesisht të aparaturave dhe pajisjeve; Mungesën e regjistrit të aktiveve nga njësitë publike; Mungesën e dokumentacionit të shfrytëzimit të mjeteve të transportit për shpenzimet e karburantit; Kryerjen e pagesave për blerje mallrash, pa hartuar më parë proces-verbalet e marrjes në dorëzim nga komisionet përkatëse dhe të pashoqëruara me dokumentacionin justifikues.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
