Të ardhurat e shqiptarëve nga puna jashtë vendit po rriten më tej gjatë këtij viti.
Të ardhurat nga puna në bilancin e pagesave për gjysmën e parë të këtij viti kishin vlerën e 333 milionë eurove, në rritje me 11.7% krahasuar me të njëjtën periudhë të vitit të kaluar.
Kjo shifër shënon një rekord të ri historik për 6-mujorin e parë të vitit.
Në terma neto (duke zbritur të ardhurat e jorezidentëve nga puna në Shqipëri), të ardhurat nga puna kishin vlerën e 312 milionë eurove, me një rritje edhe më të madhe, 12.2% krahasuar me gjysmën e parë të vitit të kaluar.
Sipas metodikës së Bilancit të Pagesave, të ardhura nga puna jashtë vendit klasifikohen kompensimi i punonjësve, që përfshin pagën, shpërblimet dhe përfitime të tjera, të fituara nga individët jorezidentë në një ekonomi, për punën e kryer për rezidentët e kësaj ekonomie.
Në këtë kategori punonjësish, përfshihen punonjësit sezonalë apo ata që punësohen për një periudhë afatshkurtër, më pak se një vit, si dhe punëtorët kufitarë të cilët e kanë qendrën e interesit të tyre ekonomik në vendin e tyre të origjinës.
Të ardhurat nga puna dhanë një kontribut të rëndësishëm në prurjet valutore në ekonomi dhe në ngushtimin e deficitit të llogarisë korrente.
Në analizat e flukseve hyrëse nga jashtë, shpesh të ardhurat nga puna jashtë vendit i bashkëngjiten dërgesave të emigrantëve dhe klasifikohen si pjesë e të ardhurave totale nga remitancat në ekonomi.
Për 6-mujorin 2025, dërgesat e emigrantëve kishin vlerën e 532 milionë eurove, në rritje me 4.3% krahasuar me të njëjtën periudhë të vitit të kaluar.
Po të mbledhin remitancat dhe të ardhurat nga puna, kontributi i tyre total në ekonominë shqiptare arriti në 865 milionë euro për gjashtë muaj, shifër kjo 7% më e lartë krahasuar me gjysmën e parë të vitit të kaluar.
Të ardhurat nga puna dhe remitancat së bashku mbulonin rreth 32% të deficitit tregtar në mallra për gjysmën e parë të këtij viti.
Puna ngelet një faktor i rëndësishëm ku mbështeten prurjet valutore dhe ngushtimi i deficitit të jashtëm të ekonomisë shqiptare. Përveç të ardhurave direkte nga puna jashtë, një kontribut të rëndësishëm ka dhënë historikisht edhe regjimi i përpunimit aktiv të mallrave.
Për 6-mujorin, ato arritën në 361 milionë euro, 0.8% më shumë krahasuar me të njëjtën periudhë të një viti më parë. Fasoneria në tre vitet e fundit ka marrë një goditje të rëndë nga forcimi i Lekut në kursin e këmbimit valutor dhe rritja e kostos së punës, por megjithatë vazhdon të jetë një burim i rëndësishëm të ardhurash për ngushtimin e deficitit të jashtëm të ekonomisë./ E.Shehu
Burimi: Banka e Shqipërisë
Postimi ” Të ardhurat nga puna jashtë vendit arritën në 333 milionë euro për gjashtë muajt e parë të vitit ” eshte marre nga Revista Monitor.
